Bhavnagar, તા.25
ભાવનગર માં એક યુવકે સાત લાખ રૂપિયા વ્યાજે લીધા હતા જેના ત્રેવીસ લાખ રૂપિયા ચુકવી આપ્યા છતાં પણ વ્યાજખોર નિવૃત વિસ્તરણ અધિકારીએ પઠાણી ઉઘરાણી કરી.યુવક તેમજ તેમના દસ વર્ષિય દિકરાને જાનથી મારી નાંખવાની ધમકી આપી હતી.
પ્રાપ્ત થતી માહિતી મુજબ શહેરમાં રહેતા નરેશભાઈ જોરસંગભાઈ પોલેતર નવેક વર્ષ અગાઉ રાજપુત યુવા સંઘના અને નિવૃત વિસ્તરણ અધિકારી ભરતસંગ પ્રતાપસંગ ઉમટ (રહે. વૃંદાવન સોસાયટી ભાવનગર) પાસેથી સાતેક લાખ રૂપિયા વ્યાજે લીધા હતા. જેના નરેશભાઈએ કટકે કટકે રૂા. 23.50 લાખ રૂપિયા ચુકતે કર્યા હતા.
જે બાદ રૂપિયાની સગવડ ન થતાં ભરતસંગ ઉમટે નરેશભાઈ પાસે સાત લાખ રૂપિયાની વ્યાજ સાથે પઠાણી ઉઘરાણી કરી, નરેશભાઈ અને તેના દિકરાને જાનથી મારી નાંખવાની ધમકી આપતા નરેશભાઈ નિલમબાગ પોલીસમાં ભરતસંગ વિરૂદ્ધ ફરિયાદ કરવા પહોંચ્યા હતા.
આ મામલે નરેશભાઈના કહેવા મુજબ, નિલમબાગ પોલીસના અધિકારીએ સૌ પ્રથમ આરોપી વિરૂદ્ધ માત્ર અરજી લિધી હતી અને પોલીસ મથકે ફરિયાદ માટે ધક્કા ખવડાવી આરોપી ભરતસંગનો સાથ આપ્યો હોય તેવું લાગતું હતું જેથી કંટાળી જઈ ભાવનગર જિલ્લા એસ.પી. નિતેશ પાંડેયને રજુઆત કરી હતી.
જે રજુઆતથી એસ.પી.એ. આરોપી વિરૂદ્ધ ફરિયાદ લેવા પોલીસને આદેશ કરાયો હતો છતાં પણ નિલમબાગ પોલીસે ફરિયાદ ન લેતા ગઇકાલે ફરી નરેશભાઈ એસ.પી. પાસે પહોંચ્યા હોવાની નિલમબાગ પોલીસને જાણ થતાં પોલીસે સામે ચાલીને વ્યાજખોર ભરતસંગ ઉમટ વિરૂદ્ધ ફરિયાદ લઇ કાર્યવાહી હાથ ધરી હતી.ભાવનગરના સિદસર ગામે મેઘાનગરમાં રહેતા મયુરસિંહ ગંભીરસિંહ ગોહિલે પોલીસ ફરિયાદમાં જણાવ્યું હતું કે, બે ટ્રકો ચોલા મંડલમ ફાયનાન્સ કંપનીમાંથી ટ્રકો ઉપર લોન કરાવી હતી. જે બાદ બંન્ને લોનના હપ્તા ન ભરી શકતા ભોજપરાના કુલદિપસિંહ નરવરસિંહ ગોહિલ પાસેથી એક લાખ રૂપિયા લીધા હતા અને બાદમાં વધુ રૂપિયાની જરૂર પડતાં નેસવડના બુધાભાઇ આહિર પાસેથી બે ટકા લેખે ત્રણ લાખ રૂપિયા વ્યાજે લીધા હતા.
જેમાં એક ટ્રકનો અકસ્માત અને એક ટ્રકનું એન્જિન ફેલ થઇ જતાં લોનના હપ્તા ચડતા હોવાથી બંન્ને ટ્રકો કુલદિપસિંહે પોતાની વાડીએ મુકાવી, ફાયનાન્સ કંપની સાથે સેટલમેન્ટ કરાવડાવી દઇ બાકીના રૂપિયા મયુરસિંહને પરત આપવાનું વચન આપેલ પરંતુ કુલદિપસિંહ અને બુધા આહિરે બંન્ને ટ્રકોના કાગળો, ટ્રકો લઇ ઉપરથી સાત લાખ રૂપિયા વ્યાજ પેટે માંગી, ટ્રકોના રૂપિયા ન આપી છેતરપિંડી આચરતા મયુરસિંહ ગોહિલે બંન્ને વ્યાજખોર કુલદિપસિંહ અને બુધા આહિર વિરૂદ્ધ વરતેજ પોલીસ મથકમાં ફરિયાદ નોંધાવતા પોલીસે તપાસ હાથ ધરી છે.
ફરિયાદીએ સૌ પ્રથમ બંને ટ્રકો ઉપર લાખો રૂપિયાની લોન લીધી હતી જેમાં એક ટ્રકનું અકસ્માત અને બીજા ટ્રકનું એન્જિન ફેલ થઈ જતા ટ્રકનું ભાડુ બંધ થઈ ગયુ હતુ જેને લઈને લોનના હપ્તા ચડી ગયા હતા જેથી વ્યાજખોરો પાસેથી લાખો રૂપિયા વ્યાજે લેવા ફરિયાદી મજબુર બન્યો હતો.
