Diu, તા.૧૦
ભારત પાકિસ્તાન વચ્ચે હાલ પરિસ્થિતિ વણસી છે. જેને લઈને ગુજરાતમાં ઘણા બધા જિલ્લાઓમાં હાઈ એલર્ટ જાહેર કરી દેવામાં આવ્યું છે. ત્યારે સંઘપ્રદેશ દીવમાં પણ હાલ પરિસ્થિતિને ધ્યાનમાં રાખીને નાગવા બીચ પર થતી એક્ટિવિટી બંધ કરી દેવામાં આવી છે. વોટર સ્પોર્ટ એક્ટિવિટી તેમજ પેરા સિલિંગ પણ બંધ કરવા માટે આદેશ આપવામાં આવ્યા છે. ઉપરાંત આગામી ૧૬ મે સુધી દીવમાં ડ્રોન ઉડાવવા પર પ્રતિબંધ લાદી દેવામાં આવ્યો છે. આપને જણાવી દઈએ કે સુરક્ષાને ધ્યાનમાં રાખીને પ્રશાસન દ્વારા આ મહત્વના નિર્ણય લેવામાં આવ્યો છે. આજે જામનગરમાં પણ સાયરન વાગ્યા છે. સાથે જ જામનગરના કલેક્ટર દ્વારા જિલ્લામાં લોકોને અપીલ કરવામાં આવી છે. જેમાં નાગરિકોને સુરક્ષિત સ્થળે રહેવા માટે અપીલ કરવામાં આવી છે. આ ઉપરાંત આજનો દિવસ વેપાર અને ધંધાને બંધ રાખવા માટે અપીલ કરવામાં આવી છે. સમગ્ર મામલે જિલ્લા તંત્ર તમામ પડકારોને પહોંચી વળવા માટે સક્ષમ છે. આ ઉપરાંત કલેક્ટર દ્વારા પણ નાગરિકોને જાહેર સ્થળોએ ન ફરવા અને સુરક્ષિત સ્થળે આશ્રય લેવા માટે સલાહ આપવામાં આવી છે. આ સિવાય આજે કચ્છમાં હાઈએલર્ટ જાહેર કરવામાં આવ્યું છે. સાથે જ સતત સાયરન વગાડવામાં આવી રહ્યા છે. લોકોને ઘરની બહાર ન નીકળવા અપીલ કરવામાં આવી રહી છે. જિલ્લા કલેક્ટર દ્વારા એલર્ટ જાહેર કરવામાં આવ્યું છે. હાલ બેથી ત્રણ વખત સાયરન પણ વગાડવામાં આવ્યા હતા.
તંત્ર દ્વારા લોકોને ખાસ અપીલ કરવામાં આવી રહી છે કે, ઘરની બહાર ન નીકળે અને સલામત સ્થળે રહે. જોકે, હાલ કઈ ગતિવિધિના કારણે હાઈએલર્ટ જાહેર કરવામાં આવ્યું છે, તે અંગે કોઈ માહિતી સામે આવી નથી. ઉલ્લેખનીય છે કે, ભૂજમાં ઈમરજન્સી સિવાય તમામ વેપાર ધંધા બંધ છે. કામ સિવાય ઘરની બહાર ન નીકળવા અપીલ કરાઈ છે. તમામ વેપાર ધંધા બંધ રાખવાનો આદેશ કરાયો છે. કચ્છ કલેક્ટર દ્વારા તમામ જનતાને આદેશ આપવામાં આવ્યો છે. ભુજ શહેરમાં તમામ વેપાર ધંધા બંધ છે. લોકોને પણ સતર્ક રહેવા માટે અપીલ કરાઈ છે.
