Mumbai, તા.૬
રણબીર કપૂરની આગામી ફિલ્મ ‘રામાયણ’ના સેટ પર આગ લાગવાની એક મોટી દુર્ઘટના સામે આવી છે. જોકે રાહતની વાત એ છે કે, આ બનાવમાં કોઈને પણ ઈજા કે જાનહાનિ થઈ નથી અને સમયસર આગ પર કાબૂ મેળવી લેવાયો હતો. ફેડરેશન ઓફ વેસ્ટર્ન ઈન્ડિયા સિને એમ્પ્લોઈઝ દ્વારા આ સમગ્ર ઘટનાની સત્તાવાર પુષ્ટિ કરવામાં આવી છે. ફેડરેશન ઓફ વેસ્ટર્ન ઈન્ડિયા સિને એમ્પ્લોઈઝ ના પ્રમુખ બીએન તિવારીના જણાવ્યા અનુસાર, સ્ટુડિયોની બહાર લગાવવામાં આવેલા એક ટેન્ટમાં આગ લાગી હતી. સદનસીબે આગને તરત જ કાબૂમાં લઈ લેવામાં આવતાં તે વધુ ફેલાઈ નહોતી અને સેટ પર હાજર તમામ લોકો સુરક્ષિત રહ્યા હતા. તેમણે અગાઉ પણ પ્રોડ્યુસર્સને સુરક્ષા વ્યવસ્થા મજબૂત કરવા તાકીદ કરી હતી, જેથી આ ઘટનાને બેદરકારી સામે એક ચેતવણી ગણાવીને ભવિષ્યમાં પૂરતી સાવચેતી રાખવા સૂચન કર્યું છે.હાલમાં ફિલ્મ ‘રામાયણ’ના બીજા ભાગનું શૂટિંગ ચાલી રહ્યું છે, જોકે આ આગ લાગી તે સમયે અભિનેતા રણબીર કપૂર કે ડિરેક્ટર ત્યાં હાજર હતા કે નહીં તેની કોઈ સ્પષ્ટ વિગત મળી નથી. અંદાજે ૪૦૦૦ કરોડના જંગી બજેટમાં બની રહેલી આ ફિલ્મ ભારતમાં ૮ નવેમ્બરના રોજ રિલીઝ થવાની છે, જ્યારે વિશ્વભરમાં તેને ૫ અને ૬ નવેમ્બર દરમિયાન રજૂ કરવામાં આવશે.
