New Delhi, તા. 31
આગામી ઓગસ્ટ મહિનામાં બેલ્જિયમ અને નેધરલેન્ડ્સમાં યોજાનારા હોકી વર્લ્ડ કપમાં ભારતીય પુરુષ અને મહિલા ટીમ એક મોટા ફેરફાર સાથે મેદાનમાં ઉતરશે. ઈતિહાસમાં પ્રથમ વખત એવું બનશે કે ભારતીય ટીમ પોતાની પરંપરાગત વાદળી (બ્લૂ) જર્સીને બદલે કેસરી રંગની જર્સી પહેરીને રમશે. આ વર્લ્ડ કપમાં પુરુષ ટીમનું નેતૃત્વ હરમનપ્રીત સિંહ અને મહિલા ટીમની કમાન સલીમા ટેટે સંભાળશે.
હોકી ઈન્ડિયાનું કહેવું છે કે વાદળી રંગના ટર્ફ (મેદાન) પર વાદળી જર્સી ભળી જતી હોવાથી રમતમાં ટેકનિકલ મુશ્કેલી પડતી હતી, જેના કારણે આ ફેરફાર કરવામાં આવ્યો છે. હોકી ઈન્ડિયાએ એવો પણ દાવો કર્યો હતો કે આ નિર્ણય ખેલાડીઓ અને સપોર્ટ સ્ટાફ સાથે ચર્ચા કર્યા બાદ લેવામાં આવ્યો છે.
જોકે, સામે આવેલાં અહેવાલો મુજબ ટીમના અનેક ખેલાડીઓએ આ દાવાને ખોટો ગણાવતાં કહ્યું છે કે જર્સી બદલવા અંગે તેમની સાથે કોઈ પણ પ્રકારની ચર્ચા કરવામાં આવી નહોતી.
જર્સીનો રંગ બદલવાના આ નિર્ણય સામે ભારતીય હોકીના ભૂતપૂર્વ ખેલાડીઓએ પણ ભારે નારાજગી વ્યક્ત કરી છે. પૂર્વ સુકાની વીરેન રસકીન્હાએ આ નિર્ણયને શરમજનક ગણાવ્યો છે, જ્યારે 1980ના ઓલિમ્પિક ગોલ્ડ મેડલ વિજેતા ટીમનાં કેપ્ટન વાસુદેવન ભાસ્કરને જણાવ્યું હતું કે નવી કેસરી જર્સી જોઈને તેમને રમવાની કોઈ પ્રેરણા મળતી નથી.
