Jharkhand,તા.૨૭
ઝારખંડ વિધાનસભા ચૂંટણી માટે પ્રથમ તબક્કાનું મતદાન ૧૩ નવેમ્બરે અને બીજા તબક્કાનું મતદાન ૨૦ નવેમ્બરના રોજ થવાનું છે. ચૂંટણીને લઈને ઉત્તેજના વધી છે. મહાગઠબંધન અને એનડીએ લગભગ તમામ બેઠકો પર ઉમેદવારો જાહેર કરી દીધા છે. વર્તમાન મુખ્યમંત્રી હેમંત સોરેનથી લઈને પૂર્વ મુખ્યમંત્રીઓ બાબુલાલ મરાંડી અને ચંપાઈ સોરેન આ ચૂંટણીમાં પોતાનું નસીબ અજમાવી રહ્યા છે. આ ઉપરાંત આ ચૂંટણીમાં અન્ય ઘણા પૂર્વ મુખ્યમંત્રીઓના પુત્ર, પુત્રવધૂ અને પત્નીઓને પણ ઉમેદવાર બનાવવામાં આવ્યા છે.
ત્રણ વખત ઝારખંડના મુખ્યમંત્રી રહી ચૂકેલા શિબુ સોરેનના પરિવારના ઘણા સભ્યો આ ચૂંટણી લડ્યા છે. તેમના પુત્ર અને મુખ્યમંત્રી હેમંત સોરેન બહેત વિધાનસભા બેઠક પરથી ચૂંટણી લડી રહ્યા છે. હેમંત ત્રણ વખત ઝારખંડની ટોચની સત્તા પર પણ પહોંચી ચૂક્યા છે. ઝારખંડ મુક્તિ મોરચાએ મુખ્યમંત્રી હેમંતની પત્ની કલ્પના સોરેનને ગાંડે બેઠક પરથી ટિકિટ આપી છે. શિબુ સોરેન પરિવારના વધુ બે સભ્યો પણ ચૂંટણી લડી રહ્યા છે.
ઝારખંડમાં ૮૧ વિધાનસભા બેઠકો માટે ૧૩ અને ૨૦ નવેમ્બરે બે તબક્કામાં મતદાન થશે, જ્યારે મત ગણતરી ૨૩ નવેમ્બરે થશે. પ્રથમ તબક્કા માટે નોમિનેશન પ્રક્રિયા ૨૫ ઓક્ટોબરે સમાપ્ત થઈ ગઈ છે જ્યારે બીજા તબક્કા માટે ૨૯ ઓક્ટોબર સુધી નોમિનેશન ભરી શકાશે.
શિબુ સોરેનના પુત્ર બસંત સોરેન જેએમએમની ટિકિટ પર દુમકાથી ચૂંટણી લડી રહ્યા છે. શિબુ સોરેનની પુત્રવધૂ સીતા સોરેન જામતારા વિધાનસભા બેઠક પરથી ભાજપના ઉમેદવાર છે. રાજ્યના પ્રથમ મુખ્યમંત્રી બાબુલાલ મરાંડી ધનવર બેઠક પરથી ભાજપના ઉમેદવાર છે. મરાંડી હાલમાં ઝારખંડ ભાજપના પ્રદેશ અધ્યક્ષ છે. ઝારખંડના ત્રણ વખતના મુખ્યમંત્રી અર્જુન મુંડાની પત્ની મીરા મુંડા ભાજપની ટિકિટ પર પોટકા સીટ પરથી ચૂંટણી લડી રહી છે. ભાજપે પૂર્વ મુખ્યમંત્રી મધુ કોડાની પત્ની ગીતા કોડાને જગન્નાથપુરથી ઉમેદવાર બનાવ્યા છે. પૂર્વ સીએમ અને ચાર દાયકાથી જેએમએમના દિગ્ગજ નેતાઓમાંના એક ચંપાઈ સોરેનને ભાજપે સરાઈકેલા વિધાનસભાથી ટિકિટ આપી છે. જ્યારે તેમના પુત્ર બાબુલાલ સોરેનને ઘાટશિલા વિધાનસભાથી મેદાનમાં ઉતારવામાં આવ્યા છે. નોંધનીય છે કે પૂર્વ સીએમ ચંપાઈ સોરેન ૩૦ ઓગસ્ટ ૨૪ના રોજ ઝારખંડ મુક્તિ મોરચા છોડીને તેમના પુત્ર બાબુલાલ સોરેન સાથે ભાજપમાં જોડાયા હતા.
