Raipur,તા.૩૦
નવજોત સિંહ સિદ્ધુ હવે તેમની પત્ની નવજોત કૌર સિદ્ધુના કેન્સરની સારવારને લઈને વિવાદમાં ફસાયા છે. તાજેતરમાં જ નવજોત સિંહ સિદ્ધુએ એક પોસ્ટ શેર કરી હતી, જેમાં તેણે પત્નીના કેન્સરની સારવાર માટેના કેટલાક ઘરેલું ઉપાયો શેર કર્યા હતા. નવજોત સિંહ સિદ્ધુ અને તેમની પત્ની હવે નવજોત કૌર સિદ્ધુના કેન્સરને દૂર કરવાના ઘરેલુ ઉપચારના દાવાને લઈને મુશ્કેલીમાં છે. છત્તીસગઢ સિવિલ સોસાયટીએ સિદ્ધુની પત્ની નવજોત કૌરને ૮૫૦ કરોડ રૂપિયાની કાનૂની નોટિસ મોકલી છે. આ નોટિસમાં કેન્સરની સારવારમાં ઘરેલું ઉપચારના યોગદાન અંગે નવજોત સિંહ સિદ્ધુના દાવા પર ૪૦ દિવસની અંદર સ્પષ્ટતા માંગવામાં આવી છે.
વાસ્તવમાં નવજોત સિંહ સિદ્ધુએ સોમવારે પોતાના સોશિયલ મીડિયા એકાઉન્ટ પર ડાયટ પ્લાન શેર કર્યો હતો. જેમાં તેણે દાવો કર્યો હતો કે આ ડાયટ પ્લાને તેની પત્નીના કેન્સરની સારવારમાં મોટી ભૂમિકા ભજવી હતી. જો કે, તેમણે તેમની પોસ્ટમાં તેમની પત્નીની સારવારમાં સર્જરી, કીમોથેરાપી, હોર્મોનલ અને ટાર્ગેટેડ થેરાપીનો પણ ઉલ્લેખ કર્યો છે. સિદ્ધિએ સારવારની સાથે પત્નીના આહાર અને જીવનશૈલીમાં થતા ફેરફારો વિશે માહિતી આપી હતી. પરંતુ, છત્તીસગઢ સિવિલ સોસાયટીનું માનવું છે કે નવજોત સિંહ સિદ્ધુના દાવાને કારણે લોકો એલોપેથીને લઈને મૂંઝવણમાં પડી રહ્યા છે.
છત્તીસગઢ સિવિલ સોસાયટીના કન્વીનર ડૉ. કુલદીપ સોલંકીનું કહેવું છે કે નવજોત સિંહ સિદ્ધુના દાવા ખોટા છે અને તેના કારણે લોકો એલોપેથી વિશે મૂંઝવણમાં મુકાઈ રહ્યા છે. ઘણા એવા કેન્સરના દર્દીઓ છે જેઓ દવા લેવા માંગતા નથી, જેના કારણે તેમના જીવનું જોખમ વધી ગયું છે. જારી કરાયેલી નોટિસમાં કહેવામાં આવ્યું છે કે જો નવજોત કૌર સિદ્ધુ તેના દાવાના પુરાવા રજૂ નહીં કરે તો તેની સામે કાયદાકીય કાર્યવાહી કરવામાં આવશે.
છત્તીસગઢ સિવિલ સોસાયટીની સૂચના અનુસાર, નવજોત સિંહ સિદ્ધુ દ્વારા શેર કરવામાં આવેલી પોસ્ટ વિશે જાણ્યા પછી, દેશ અને વિદેશમાં કેન્સરના દર્દીઓમાં અસ્પષ્ટતાની સ્થિતિ ઊભી થઈ છે અને લોકોમાં એલોપેથીની દવાઓનો વિરોધ ઊભો થયો છે. નોટિસમાં એમ પણ કહેવામાં આવ્યું છે કે જો સિદ્ધુ તેમના નિવેદન માટે માફી નહીં માંગે અથવા તેની વૈજ્ઞાનિક પ્રમાણિકતા સાથે સંબંધિત દસ્તાવેજો રજૂ નહીં કરે તો તેઓ કોર્ટનો સંપર્ક કરશે. અગાઉ ટાટા મેમોરિયલ હોસ્પિટલે પણ ઘરેલુ ઉપચાર વડે કેન્સરની સારવાર કરવાના દાવાઓને નકારી કાઢતી એડવાઈઝરી જારી કરી હતી.
