માતા સાથે ઝઘડો થતા ઘરેથી જતા રહેલા મુકબધિર યુવતીનું પરિવાર સાથે સુખદ મિલન
Rajkot તા. ૯ઃ
પારિવારિક કલેશમાં ૧૮૧ ટીમની સૂઝબૂઝથી માતા પુત્રીનું સુખદ મિલન કરાવવાની ઘટના સામે આવી છે. જેમાં ગોંડલમાં માતા સાથે ઝઘડો થતા મુકબધિર યુવતી ઘર છોડીને બસ સ્ટેન્ડ પહોંચી ગયા હતાં. સ્થાનિક નાગરિકના ધ્યાને આ વાત આવતા તેમજ યુવતી ઘરે નહીં જવાની જીદ કરતા ૧૮૧ અભયમ ટીમને મદદ માટે કોલ કરવામાં આવ્યો હતો.
અભયમ ટીમના કાઉન્સેલરશ્રી લતાબેન ચૌધરી સહીતની ટીમ ગોંડલ બસ સ્ટેન્ડ ખાતે પહોંચી ત્યારે તેમને મળીને મુકબધિર યુવતી ધ્રુસકે ધ્રુસકે રડી પડી હતી. ટીમ દ્વારા યુવતીને સાઈન લેંગ્વેજમા સમજાવવાના અથાગ પ્રયત્ન કરવામાં આવ્યાં, પરંતુ યુવતી કોઈ વાત સાંભળવા તૈયાર ન હતી. લતાબેને ધીરજપૂર્વક યુવતીને સમગ્ર ઘટના અંગે વાત કરવા જણાવ્યું હતું.
યુવતીએ આપવીતી જણાવતા કહ્યું હતું કે, તેણી મુકબધિર હોવા છતાં માતા તેની સાથે સમય વિતાવવાને બદલે બીજા લોકો સાથે બેસવા જતા રહેતા હોય તે બાબતે બંને વચ્ચે ઝઘડો થતો હતો. યુવતીને તેની માતાએ માર માર્યો હોવાના નિશાન પણ બતાવ્યા હતા.
આ અંગે યુવતીની માતા સાથે વાત કરતા તેમણે જણાવ્યું હતું કે, તેની પુત્રી મુકબધિર હોવાથી પરિવારમાં તે કોઈનું માનતી ન હતી. બંનેની વાત સાંભળ્યા બાદ ટીમ દ્વારા માતાને મુકબધિર દિકરીને સાચવવા અથવા તો મૂંગા બહેરા આશ્રમમાં મૂકી આવવાની સલાહ આપી હતી. તેમજ યુવતીને પણ માતા સાથે ઝઘડો ન કરવા સમજાવતા બંને માતા પૂત્રી સાથે શાંતિપૂર્વક રહેવા સહમત થયા હતા.અભયમ ટીમ દ્વારા પારિવારિક ઝઘડામાં સુખદ સમાધાન બદલ પરિવારજનોએ તેમનો આભાર માન્યો હતો.
