New Delhi,તા.૮
સુપ્રીમ કોર્ટના ચીફ જસ્ટિસ પર ભાજપના સાંસદ નિશિકાંત દુબેની ટિપ્પણીના મામલે સુપ્રીમ કોર્ટે ઠપકો આપ્યો છે અને તેને અત્યંત બેજવાબદાર ગણાવ્યો છે. સુપ્રીમ કોર્ટે કહ્યું કે આ ટિપ્પણીઓ ધ્યાન ખેંચવાની વૃત્તિને પ્રતિબિંબિત કરે છે અને તિરસ્કારની કાર્યવાહી શરૂ કરવાનો ઇનકાર કરતા કહ્યું કે અદાલતો ફૂલો જેવી નાજુક નથી કે આવા હાસ્યાસ્પદ નિવેદનો સામે કરમાઈ જાય.
સુપ્રીમ કોર્ટે વધુમાં કહ્યું કે અમે સ્પષ્ટ કરવા માંગીએ છીએ કે સાંપ્રદાયિક નફરત ફેલાવવાના અથવા અપશબ્દોનો ઉપયોગ કરવાના કોઈપણ પ્રયાસ સામે કડક કાર્યવાહી થવી જોઈએ.
સુપ્રીમ કોર્ટે કહ્યું કે નફરતભર્યા ભાષણને સહન કરી શકાય નહીં કારણ કે તે લક્ષિત જૂથના સભ્યોના ગૌરવ અને આત્મસન્માનને ઠેસ પહોંચાડે છે. સીજેઆઈ સંજીવ ખન્ના અને જસ્ટિસ સંજય કુમારની બેન્ચે અરજીનો નિકાલ કર્યો.
ભાજપના સાંસદ નિશિકાંત દુબેએ સુપ્રીમ કોર્ટે વકફ (સુધારા) કાયદાને કેવી રીતે હેન્ડલ કર્યો તેના પર ટિપ્પણી કરી હતી. તેના કારણે આ વિવાદ ઉભો થયો. ગયા અઠવાડિયે ઇન્ટરવ્યુમાં તેમણે કહ્યું હતું કે, “સુપ્રીમ કોર્ટ પોતાની સીમાઓ ઓળંગી રહી છે. જો બધું ત્યાં જ નક્કી કરવું હોય, તો સંસદ બંધ કરી દો.”
તેમણે આરોપ લગાવ્યો હતો કે ન્યાયતંત્ર ધાર્મિક વિખવાદ ઉશ્કેરી રહ્યું છે અને સીજેઆઇ ડીવાય ચંદ્રચુડ પર “ગૃહયુદ્ધો” માટે જવાબદાર હોવાનો આરોપ લગાવ્યો હતો. તેમણે કલમ ૩૭૭ પર કોર્ટના નિર્ણયની પણ ટીકા કરી, અને દાવો કર્યો કે તે કાયદાકીય સત્તાઓનું હડપન કરે છે.
તેમણે કહ્યું, “તમે આ દેશને અરાજકતા તરફ લઈ જવા માંગો છો.” ભાજપે તરત જ નિશિકાંત દુબેની ટિપ્પણીથી પોતાને દૂર કરી દીધા. પાર્ટી પ્રમુખ જેપી નડ્ડાએ કહ્યું કે આ ટિપ્પણી દુબેનો વ્યક્તિગત અભિપ્રાય છે અને ન્યાયતંત્ર પ્રત્યે ભાજપના આદરનો પુનરોચ્ચાર કર્યો. તેમણે પક્ષના નેતાઓને આવા નિવેદનો આપવા સામે ચેતવણી પણ આપી.
સુપ્રીમ કોર્ટ અને સીજેઆઇ વિશે કરેલી ટિપ્પણીઓ બાદ નિશિકાંત દુબેને ટીકાનો સામનો કરવો પડ્યો છે, જેના કારણે ઘણો વિવાદ થયો હતો. તેમના નિવેદનની તેમના પોતાના પક્ષ સહિત તમામ તરફથી તીવ્ર ટીકા થઈ હતી અને ભાજપ પ્રમુખે જાહેરમાં દુબેના વિચારોથી પોતાને દૂર રાખ્યા હતા.
