New Delhi, તા. 31
રેલગાડીમાં મુસાફરી દરમિયાન ભારે સામાન લઈ જનારાઓએ હવે તેના માટે વધારાનું શુલ્ક ચૂકવવું પડશે. રેલવે બોર્ડ આજથી આ નિયમને કડકાઈથી લાગું કરવા જઈ રહ્યું છે. રેલ મંત્રાલયે તમામ ઝોનના વાણિજ્યિક વિભાગને તેનાં માટે તૈયારી કરવાનાં નિર્દેશ આપ્યાં છે.ઉત્તર રેલવેના મુખ્ય જનસંપર્ક અધિકારી હિમાંશુ શેખર ઉપાધ્યાયે જણાવ્યું કે નિયમ લાગું કરવાની તૈયારી ચાલી રહી છે અને તે સુનિશ્ચિત કરવામાં આવશે કે મુસાફરોને બિનજરૂરી હેરાનગતી ન થાય. રેલવે અનુસાર, ખાસ કરીને પૂર્વ દિશાની ટ્રેનોમાં ઘણાં મુસાફરો મોટી માત્રામાં સામાન લઈને મુસાફરી કરે છે, જેનાં કારણે અન્ય મુસાફરોને
બેસવામાં અને આવવા-જવામાં તકલીફ પડે છે.
ટિકિટ બુક કરતી વખતે જાણકારી આપવી પડશે
સેન્ટર ફોર રેલવે ઇન્ફોર્મેશન સિસ્ટમ (CRIS) એ ટિકિટ બુકિંગ સોફ્ટવેરમાં વધારાનાં સામાનની બુકિંગનો વિકલ્પ ઉમેરી દીધો છે, જેથી મુસાફર ટિકિટ બુક કરતી વખતે જ વધારાનાં સામાનની જાણકારી આપી શકે.
જોકે, વધારાનાં સામાન પર પ્રતિ કિલોગ્રામ કેટલું શુલ્ક લેવામાં આવશે તેનો અંતિમ નિર્ણય હજુ થયો નથી. જણાવવામાં આવી રહ્યું છે કે ટિકિટ નિરીક્ષક (TTE) વધારાનો સામાન લઈ જવા પર સંબંધિત મુસાફર પાસેથી શુલ્ક લઈ શકે છે.
1 ઓગસ્ટથી આ પણ ફેરફારો થશે
1. કેન્દ્રીય KYCની વ્યવસ્થા લાગું થશે
બેંકિંગ, વીમા અને મ્યુચ્યુઅલ ફંડ ક્ષેત્રમાં કેન્દ્રીય KYC 2.0 લાગું કરવામાં આવશે. તેનાં દ્વારા ગ્રાહકોની ઓળખ એક કેન્દ્રિત ડિજિટલ સિસ્ટમથી ચકાસવામાં આવશે. આનાથી વારંવાર દસ્તાવેજો જમા કરાવવાની જરૂર નહીં પડે અને બેંકિંગ સેવાઓ પહેલા કરતા વધુ સુરક્ષિત અને સરળ બનશે.
2. મારુતિ પોતાની કારોની કિંમતોમાં વધારો કરશે
દેશની સૌથી મોટી કાર નિર્માતા મારુતિ સુઝુકીએ 1 ઓગસ્ટથી પોતાનાં તમામ મોડેલની કિંમતો વધારવાનો નિર્ણય લીધો છે. કંપની અલગ-અલગ મોડેલની કિંમતમાં મહત્તમ 30,000 રૂપિયા સુધીનો વધારો કરશે. જો તમે નવી કાર ખરીદવાનું આયોજન કરી રહ્યા છો, તો હવે તમારે વધુ કિંમત ચૂકવવી પડી શકે છે.
3. ITR ભરવામાં મોડું થાય તો મોંઘુ પડી શકે
નાણાકીય વર્ષ 2026-27 માટે ITR-1 અને ITR-2 દાખલ કરવાની અંતિમ તારીખ 31 જુલાઈ છે. સમય મર્યાદા પછી રિટર્ન દાખલ કરનારા કરદાતાઓને વિલંબ શુલ્ક ચૂકવવું પડી શકે છે. આવકનાં આધારે આ શુલ્ક 1,000 રૂપિયાથી 5,000 રૂપિયા સુધીનું હોઈ શકે છે.
4. ક્રેડિટ કાર્ડ શુલ્ક અને રિવોર્ડમાં બદલાવ
1 ઓગસ્ટથી ઘણી બેંકો અને નાણાકીય સંસ્થાઓ પોતાનાં ક્રેડિટ કાર્ડથી જોડાયેલાં નિયમોમાં બદલાવ કરશે. તેમાં રિવોર્ડ પોઈન્ટ, વાર્ષિક ફી અને કેટલાક સેવા શુલ્ક સામેલ છે. નિષ્ણાતો અનુસાર, ગ્રાહકોએ પોતાની બેંકની નવી શુલ્ક યાદી અને ક્રેડિટ કાર્ડની શરતોની સમીક્ષા કરવી જોઈએ.
