Islamabad, તા.૨૨
પાકિસ્તાનના પેટ્રોલિયમ મંત્રી અલી પરવેઝ મલિકે, પાકિસ્તાનમાં સંભવિત ઈંધણની અછત અંગે ચેતવણી ઉચ્ચારી હતી. તેમણે કહ્યું કે જો ઈંધણની અછત સર્જાય, તો પાકિસ્તાનમાં Petrolના ભાવ રૂપિયા ૧,૦૦૦ પ્રતિ લિટર સુધી વધી શકે છે. તેમણે વધુમાં ઉમેર્યું, “એવું પણ બની શકે કે કોઈપણ કિંમતે Petrol ઉપલબ્ધ ના પણ હોય.” પેટ્રોલિયમ મલિકના આ નિવેદનને કારણે પાકિસ્તાનની જનતામાં ચિંતા વધી ગઈ છે. પેટ્રોલિમય પ્રધાના આ વિવાદાસ્પદ નિવેદનના એક દિવસ પહેલા જ, પાકિસ્તાની સરકારે પાત્ર નાગરિકો માટેની ઈંધણ રાહત યોજના હેઠળ પેટ્રોલ પરની ‘પ્રતિ ટોકન પાંચ લિટર’ની મર્યાદા હટાવી લીધી હતી.
પોતાના સંબોધન દરમિયાન, પેટ્રોલિયમ મંત્રી મલિકે ભારપૂર્વક જણાવ્યું હતું કે, હાલમાં પાકિસ્તાનમાં ઈંધણની કોઈ અછત નથી, કારણ કે સપ્ટેમ્બર માટેના શિપમેન્ટ અને ઓક્ટોબર માટેનું આયોજન પહેલેથી જ નક્કી કરી લેવામાં આવ્યું છે. જોકે, ઈંધણની ભૌતિક ઉપલબ્ધતા જાળવી રાખવી એ સરકારની સર્વોચ્ચ પ્રાથમિકતા છે.
તેમણે નોંધ્યું હતું કે, પ્રાદેશિક સંઘર્ષોને કારણે આંતરરાષ્ટ્રીય ક્રૂડ ઓઈલના ભાવમાં લગભગ ૮૦%નો વધારો થયો હોવા છતાં, પાકિસ્તાને અત્યાર સુધી સ્થાનિક ગ્રાહકો પર માત્ર ૫૦% જેટલો જ ભાવ વધારો લાદ્યો છે.
જોકે પાકિસ્તાને ઓક્ટોબર સુધીના ઈંધણ પુરવઠાનું આયોજન કર્યું છે, પરંતુ હોરમૂઝ સ્ટ્રેટ લાંબા સમય સુધી બંધ રહેવાની અને મધ્ય પૂર્વમાં સંઘર્ષ વધવાની શક્યતા આ યોજનાઓને ખોરવી શકે છે. સાઉદી અરેબિયાની ‘ઈસ્ટ-વેસ્ટ પાઈપલાઈન’ પર હુથી બળવાખોરોના હુમલાને કારણે પાકિસ્તાન માટે પુરવઠાનો એક મહત્વપૂર્ણ વૈકલ્પિક માર્ગ મર્યાદિત થઈ ગયો છે. પરિણામે, દેશ ગલ્ફ ક્ષેત્રની બહાર વૈકલ્પિક સપ્લાયર્સ શોધી રહ્યો છે, જેમાં યુએસ, પશ્ચિમ આફ્રિકા અને લિબિયામાંથી ક્રૂડ ઓઈલની આયાત કરવી અથવા ઓમાન થઈને શિપમેન્ટ મેળવવાનો સમાવેશ થાય છે. પાકિસ્તાન વધતી જતી મુશ્કેલીઓનો સામનો કરવા માટે તૈયાર છે.
ઉદ્યોગના નિષ્ણાતોનું કહેવું છે કે પાકિસ્તાનનો હાલનો ઓઈલ સ્ટોક અને બુક કરાયેલ કાર્ગો ઓક્ટોબર સુધીની માંગને પહોંચી વળવા માટે પૂરતો છે, પરંતુ જો શિયાળાની ઋતુ સુધી પ્રાદેશિક સંઘર્ષો ચાલુ રહેશે તો નવેમ્બરથી પુરવઠાની અછત શરૂ થઈ શકે છે. જો આવું થાય, તો આર્થિક સંકટનો સામનો કરી રહેલા પાકિસ્તાનની મુશ્કેલીઓ અનેકગણી વધી જશે. આવી સ્થિતિમાં, પાકિસ્તાની સરકાર આ બોજ સીધો જ જનતા પર નાખી શકે છે.
