(મિલાપ રૂપારેલ)
Amreli તા.27
અમરેલી જિલ્લામાં સ્થાનિક સ્વરાજ્યની ચૂંટણીમાં કુલ 6 નગરપાલિકાઓની સામાન્ય ચૂંટણી તથા કુલ 11 તાલુકા પંચાયતોની સામાન્ય ચૂંટણી પ્રક્રિયા હેઠળ ગઈકાલ સવારના 7 વાગ્યાથી સાંજના 6 વાગ્યા સુધી મતદાન યોજાયું હતું. દિવસ દરમિયાન એકાદ-બે નાની ઘટનાઓને બાદ કરતાં સમગ્ર જિલ્લામાં શાંતિપૂર્ણ વાતાવરણમાં મતદાન પૂર્ણ થયું હતું. કાળઝાળ ગરમી હોવા છતાં મતદારોમાં શરૂઆતના સમયમાં ઉત્સાહ જોવા મળ્યો હતો, જ્યારે બપોર બાદ મતદાન ધીમું પડતાં ઉમેદવારોમાં ચિંતા ફેલાઈ હતી. આજે ચૂંટણી દરમિયાન કેટલાંકસ્થળોએ ઇવીએમ મશીન બદલવાં પડયાં હતાં.
જિલ્લા પંચાયત ચૂંટણી 2,57,191 પુરુષ મતદારો અને 2,01,110 સ્ત્રી મતદારોએ મતદાન કરીને લોકશાહીના પર્વની ઉજવણીમાં ભાગ લીધો હતો.
કુલ 6 નગરપાલિકામાં 1,08,698 પુરુષ જ્યારે 99,163 સ્ત્રી અને 20 અન્ય મતદારો સમાવિષ્ટ છે. ગઈકાલે મતદાન અન્વયેકુલ 6 પાલિકામાં અંદાજે કુલ 66,808 પુરુષ મતદારો, 53,564 સ્ત્રી મતદારો તથા અન્ય 11 મતદારોએ મતદાન કર્યું હતું.
જ્યારે 11 તાલુકા પંચાયતોમાં અંદાજે 2,52,128 પુરુષ મતદાતા અને 1,96,667 સ્ત્રી મતદાતાઓએ મતદાન કર્યું હતુ. આમ કુલ મળીને 4,48,795 મતદાતાઓ મતદાન કરીને લોકશાહીના પર્વમાં સહભાગી બન્યા હતા.
અમરેલી જિલ્લામાં ગઈકાલે 44-5 ડિગ્રી સુધી પહોંચેલા તાપમાન વચ્ચે મતદાન યોજાયું હતું. સવારે ઠંડકભર્યા વાતાવરણમાં મતદાન મથકો પર મતદારોની લાંબી લાઈનો લાગી હતી, પરંતુ બપોરના કાળઝાળ તાપ શરૂ થતાં મતદાનની ગતિ ધીમી પડી ગઈ હતી. ગરમીના કારણે ઘણા મતદારો મતદાનથી દૂર રહ્યા હોવાનું જોવા મળ્યું હતું.
ચૂંટણી તંત્ર દ્વારા મતદાન મથકો પર પૂરતી છાયા અને પાણીની સુવિધા ન હોવાના કારણે મતદારોને ભારે મુશ્કેલીનો સામનો કરવો પડ્યો હતો, જેનાથી મતદાન પર અસર જોવા મળી હતી. ઉપરાંત, દર ચૂંટણીની જેમ આ વખતે પણ વોટર સ્લિપનું યોગ્ય વિતરણ ન થતાં ઘણા મતદારો નિરાશા અનુભવી રહ્યા હતા.
ચૂંટણી દરમિયાન રાજકીય આગેવાનોમાં પણ મતદાનનો ઉત્સાહ જોવા મળ્યો હતો. રાજ્યના ઊર્જા મંત્રી કૌશિક વેકરિયાએ પોતાના વતન દેવરાજીયા ગામે પરિવાર સાથે જઈ મતદાન કર્યું હતું. જ્યારે અમરેલીના સાંસદ ભરત સુતરીયાએ પોતાની પત્ની સાથે બાઈક પર આવી જરખીયા ગામે મતદાન કર્યું હતું.
રાજકોટના સાંસદ અને પૂર્વ કેન્દ્રીય મંત્રી પરશોત્તમ રૂપાલાએ ઇશ્વરીયા ગામે મતદાન કર્યું હતું, જ્યારે ઇફ્કોના ચેરમેન દિલીપ સંઘાણીએ પોતાના વતન માળીલા ગામે પત્ની સાથે જઈ મતાધિકારનો ઉપયોગ કર્યો હતો.મતદાનના આંકડા મુજબ, અમરેલી જિલ્લાની 6 નગરપાલિકાઓમાં સરેરાશ આશરે 58 ટકા મતદાન નોંધાયું હતું, જ્યારે 11 તાલુકા પંચાયતોમાં અંદાજે 53 ટકા જેટલું મતદાન નોંધાયું હોવાનું સામે આવ્યું છે. જિલ્લા પંચાયતમાં પર.99 ટકા મતદાન નોંધાયુ હતું.
ગઈકાલે ચૂંટણીના મોકડ્રીલ સમય દરમિયાન તાલુકા જિલ્લા પંચાયતમાં 10 સી.યુ. મશીન તથા 2 બી.યુ. બદલવા પડ્યા હતાં. નગરપાલિકામાં 4 બી.યુ. મશીન બદલવા પડયાં હતાં. જ્યારે ચાલુ મતદાન દરમિયાન પણ 1 સી.યુ. મશીન ખરાબ થતાં બદલવાની ફરજ પડી હતી. તથા પાલિકાની ચૂંટણીમાં 1 સી.યુ. તથા 5 બી.યુ. ખરાબ થતાં બદલવાની ફરજ પડી હતી.અમરેલી જિલ્લામાં ચૂસ્ત પોલીસ બંદોબસ્ત વચ્ચે શાંતિપૂર્ણ માહોલમાં મતદાન સંપન્ન થયું હતું.
ચૂંટણી સાથે સંકળાયેલ તમામ સ્ટાફ દ્વારા સરાહનીય કામગીરી કરવામાં આવી હતી. અનેક મતદાન મથકો ખાતે વરિષ્ઠ અને દિવ્યાંગ મતદારો મતદાન મથક સુધી સરળતાથી પહોંચીને પોતાનો કિંમતી મત આપી શકે તે માટે પોલીસ તંત્ર દ્વારા તમામ પ્રકારની મદદ પહોંચાડવામાં આવી હતી.
