(નયના દવે દ્વારા)
Jamnagar તા.૩૧
દેવભૂમિ દ્વારકા જિલ્લાના ભાણવડ પોલીસ સ્ટેશનમાં નોંધાયેલા પ્રોહિબિશનના બે ગુનાઓમાં નાસતા ફરતા બે આરોપીઓને જામનગર સિટી ’એ’ ડિવિઝન પોલીસ સ્ટેશનની સર્વેલન્સ ટીમે ઝડપી પાડી ભાણવડ પોલીસને સોંપવાની કાર્યવાહી હાથ ધરી છે. જામનગરના સિટી ’એ’ ડિવિઝન પોલીસ સ્ટેશનના પોલીસ ઇન્સ્પેક્ટર વી. એમ. ડોડિયાની દેખરેખમાં સર્વેલન્સ સ્ક્વોડ પેટ્રોલિંગમાં હતી.
દરમિયાન એ.એસ.આઈ. મહીપાલસિંહ મયુરસિંહ જાડેજા અને એ.એસ.આઈ. નરેન્દ્રસિંહ ખુમાનસિંહ ઝાલાને મળેલી બાતમીના આધારે ભાણવડ પોલીસ સ્ટેશનના પ્રોહિબિશન ગુનામાં નાસતા ફરતા આરોપી હિતેષ ઉર્ફે સાકીડો સોમાભાઈ (ઉં. ૩૩), રહે. સાધના કોલોની, જામનગરને તેના નિવાસસ્થાનેથી ઝડપી પાડવામાં આવ્યો હતો. તેની સામે જામનગર સિટી ’એ’ ડિવિઝન પોલીસ સ્ટેશનમાં પણ પ્રોહિબિશનનો ગુનો નોંધી કાયદેસરની કાર્યવાહી હાથ ધરવામાં આવી હતી.
આ ઉપરાંત એ.એસ.આઈ. મહીપાલસિંહ જાડેજા અને પોલીસ હેડ કોન્સ્ટેબલ મહેશભાઈ ધુડાભાઈ મોરીને મળેલી બાતમીના આધારે ભાણવડ પોલીસ સ્ટેશનના અન્ય પ્રોહિબિશન કેસમાં નાસતા ફરતા આરોપી નાજીર ઉર્ફે નાજલો નુરમામદભાઈ ધોધા (ઉં. ૨૭), રહે. શંકરટેકરી, જામનગરને પણ તેના ઘરેથી ઝડપી પાડવામાં આવ્યો હતો. તેની સામે પણ જામનગર સિટી ’એ’ ડિવિઝન પોલીસ સ્ટેશનમાં ગુનો નોંધી કાયદેસરની કાર્યવાહી કરવામાં આવી હતી. પકડાયેલા બંને આરોપીઓ ભાણવડ પોલીસ સ્ટેશનના ગુનાઓમાં વોન્ટેડ હોવાથી તેમની અટકાયત અંગે ભાણવડ પોલીસને જાણ કરવામાં આવી હતી અને આગળની કાર્યવાહી માટે આરોપીઓને સોંપવાની પ્રક્રિયા હાથ ધરવામાં આવી છે.
