New Delhi, તા.4
વડાપ્રધાન નરેન્દ્ર મોદીના વીડીયો હટાવી દેવાનું પગલું રાષ્ટ્રને અસ્થિર કરવાનો પ્રયાસ હોવાનો આરોપ લગાવીને સંસદીય સમિતિએ `મેટા’ના વડા માર્ક ઝુકરબર્ગ તરફથી જાહેર માફીની માંગ કરી છે અન્યથા કંપની સામે આકરા એક્શનની ચેતવણી આપી છે.
આઇટી મંત્રાલય હેઠળની સ્ટેન્ડિંગ કમીટીના અધ્યક્ષ નીશીકાંત દુબેએ કહ્યું કે વડાપ્રધાન મોદીના વીડીયો હટાવવા તે ગંભીર બાબત છે. સંસદીય સમિતિએ કંપની અધિકારીઓનો ઉધડો લીધો છે અને `મેટા’ સમક્ષ બે માગણી રજુ કરવામાં આવી છે. કંપનીના વડા માર્ક ઝુકરબર્ગ ખૂદ માફી માંગે તેવી તાકિદ કરવામાં આવી છે. અન્યથા કંપનીને કલમ 79 હેઠળ અપાયેલું રક્ષણ પરત લઇ લેવાશે.
વડાપ્રધાન મોદીના વીડીયો હટાવવા તે ગંભીર બાબત છે અને ભારતને અસ્થિર કરવાના પ્રયાસરૂપ ગણી શકે છે. મોડી રાત્રે 12.30થી સવારે પાંચ વાગ્યા સુધી વીડીયો ક્નટેન્ટ અદ્રશ્ય રહ્યાનું કંપનીએ જ સ્વીકાર્યું છે અને તે ઘણી ગંભીર બાબત છે.
અગાઉના વિવાદોનો ઉલ્લેખ કરતાં નીશીકાંત દુબેએ કહ્યું કે 2024ની ચૂંટણી વિશે વિધાન કર્યા બાદ ઝુકરબર્ગે માંગી હતી તેના પરથી જ દેશને અસ્થિર કરવાનો પ્રયાસ ગણી શકાય છે. તેઓએ મેટા, યુ-ટ્યુબ તથા `એક્સ’ પર પણ આક્ષેપ કર્યા હતા.
બાળકો પરના જાતિય હુમલા તથા મહિલાઓ વિશેના વાંધાજનક ક્નટેન્ટ હટાવવા અસરકારક કાર્યવાહી કરાતી નથી. આ પ્રકારના કેસોને ધ્યાને રાખીને કલમ 79 હેઠળ અપાતા રક્ષણ વિશે ફેરવિચારણા કરવા સમિતિએ ભલામણ કરી છે. તેલંગાણા સરકારે મેટા સામે કરેલી એફઆઇઆરનો પણ ઉલ્લેખ કર્યો હતો.
અત્રે ઉલ્લેખનીય છે કે, વડાપ્રધાન મોદીએ 28 જુલાઇએ સતાવાર ફેસબુક પેજ પર વીડિયો પોસ્ટ કર્યો હતો તે અચાનક ગાયબ થઇ ગયો હતો. આંદોલન ચલાવતા વિદ્યાર્થીઓને આ વીડિયો દ્વારા મેસેજ અપાયો હતો.
