Rajkot તા. ૯ઃ
રાજ્યપાલ શ્રી Acharya Devvratએ રાજકોટ જિલ્લાના પ્રવાસ દરમિયાન આજે સવારે ગુંદા ગામે પ્રગતિશીલ ખેડૂત શ્રી રાજેશભાઈ લીંબાસીયાના મોડેલ ફાર્મ ‘‘વિશ્વંતી નેચરલ્સ‘‘ની મુલાકાત લીધી હતી. ખેતી, ગાય અને ગ્રામ્ય સંસ્કૃતિનું મહત્વ દર્શાવતા રાજ્યપાલશ્રીએ અહીં જાતે ગૌ દુગ્ધ દોહન કર્યું હતું.
તેમણે મોડેલ ફાર્મમાં પ્રાકૃતિક પદ્ધતિથી તૈયાર કરાતા વિવિધ ખાતર અને પ્લાન્ટ તેમજ પ્રાકૃતિક ખેતી અને પાકનું નિરીક્ષણ કર્યું હતું. અહીં વિવિધ પાકમાં ફળ અને ફૂલનું સારું પ્રમાણ તેમજ તમામ પાક કીટક અને બીમારીમુક્ત જોઈ હર્ષની લાગણી વ્યક્ત કરી હતી.
ખેડૂત શ્રી રાજેશભાઈનો યુવાન દીકરો કેવિન પણ પ્રાકૃતિક કૃષિ કાર્યમાં સહભાગી થતો હોવાનું જાણીને રાજ્યપાલશ્રીએ આનંદ વ્યક્ત કરતા કહ્યું હતું કે, ભાવિ પેઢી પ્રાકૃતિક કૃષિ સાથે ધરતીના જતન માટે તૈયાર થાય એ જરૂરી છે.
આ સમયે આસપાસના ૧૦૦થી વધુ ખેડૂતો પણ રાજ્યપાલશ્રીને મળવા આવ્યા હતા. રાજ્યપાલશ્રીએ તમામ ખેડૂતોને પ્રાકૃતિક ખેતીનું મહત્વ સમજાવતો માહિતીસભર સંવાદ કર્યો હતો.
રાજ્યપાલશ્રીએ જણાવ્યું હતું કે, પ્રાકૃતિક ખેતી માત્ર ખેતીની પદ્ધતિ નથી, પરંતુ જમીન, પાણી, પર્યાવરણ અને માનવ સ્વાસ્થ્યના સંરક્ષણ સાથે જોડાયેલો ટકાઉ માર્ગ છે. રાસાયણિક ખાતરો અને જંતુનાશકોના અતિશય ઉપયોગને કારણે જમીનની ફળદ્રુપતા, ભૂગર્ભ જળ અને પર્યાવરણને થતી અસરોનો ઉલ્લેખ કરીને તેમણે ખેડૂતોને પ્રાકૃતિક ખેતી તરફ આગળ વધવા પ્રેરણા આપી હતી.
તેમણે ખેડૂતોને દેશી ગાય આધારિત જીવામૃત, ઘનજીવામૃત, બીજામૃત, આચ્છાદન અને બહુવિધ પાક પદ્ધતિ જેવી પ્રાકૃતિક ખેતીની પદ્ધતિઓથી થતા ફાયદાઓ વર્ણવ્યા હતા. આ સાથે કહ્યું હતું કે, આવી પદ્ધતિઓથી ખેતીનો ખર્ચ ઘટે છે. તેમણે ખેડૂતોને પોતાની જમીનનો ઓર્ગૅનિક કાર્બન નિયમિત ચેક કરવા જણાવ્યું હતું.
રાજ્યપાલશ્રીએ ખેડૂતોને અપીલ કરતાં જણાવ્યું હતું કે શરૂઆતમાં પોતાની જમીનના નાના ભાગમાં પ્રાકૃતિક ખેતીનો પ્રયોગ શરૂ કરી તેના પરિણામોનો જાતે અનુભવ કરવો જોઈએ. ’પહેલું સુખ તે જાતે નર્યાની ભાવનાને સાકાર કરવા અને આવનારી પેઢીને સ્વસ્થ પર્યાવરણ તથા પોષણયુક્ત ખોરાક આપવાના હેતુથી પ્રાકૃતિક કૃષીનો વ્યાપ વધારવો જરૂરી છે, તેમ તેમણે ભારપૂર્વક જણાવ્યું હતું.
જીવામૃત, ઘન જીવામૃત કેમ બનાવાય તેની સરળ અને ઊંડાણપૂર્વકની માહિતી સાથે તેના અગણિત ફાયદા જાણીને ખેડૂતો ઝેરમુક્ત ખેતી અપનાવવા પ્રેરિત થયા હતા. રાજ્યપાલશ્રીએ કહ્યું હતું કે, રાજ્યમાં આજે ૯ લાખથી વધુ ખેડૂતો પ્રાકૃતિક ખેતી કરી રહ્યા છે.
રાજ્યપાલશ્રીએ ખેડૂતોને કહ્યું હતું કે, પ્રાકૃતિક ખેતીથી જમીન એટલી ફળદ્રુપ અને શક્તિશાળી બને છે કે તેમાં બીમારીઓ આવતી નથી. તેમણે ખેડૂતોને ખાસ આગ્રહ કર્યો હતો કે, આ પ્રાકૃતિક ખેતર જોઈને પ્રેરણા લો અને રાસાયણિક ખાતર છોડો. તેમણે કહ્યું હતું કે, પ્રાકૃતિક ખેતી અપનાવો અને જમીનને ઉપજાઉ બનાવો.
રાજ્યપાલશ્રીની વાત સાંભળીને ખેડૂતોએ પ્રાકૃતિક કૃષિ તરફ વળવા પ્રતિબદ્ધતા દર્શાવી હતી. આમ અહીંનું ખેતર આજે ખેડૂતો માટે પ્રાકૃતિક કૃષિની જીવંત પાઠશાળા બની ગયું હતું.
આ તકે ખેડૂત શ્રી રાજેશભાઈ લીંબાસીયાએ પોતાને પ્રાકૃતિક ખેતીની પ્રેરણા રાજ્યપાલશ્રી પાસેથી મળી હોવાનું જણાવીને આભાર પ્રકટ કર્યો હતો. આ સાથે પોતાનો અનુભવ વહેંચતા કહ્યું હતું કે, પ્રાકૃતિક ખેતીથી એક એકરમાં રૂ.૧૦ લાખનું ઉત્પાદન થાય છે.
ફાર્મની મુલાકાત બાદ રાજ્યપાલશ્રીએ આજે ગુંદા ગામમાં અનુસૂચિત જાતિ પરિવાર હીરાભાઈ સાગઠીયાના ઘરે અલ્પાહાર કર્યો હતો. આ તકે તેમણે પરિવાર સાથે આત્મીય ભાવથી સંવાદ કર્યો હતો. રાજ્યપાલશ્રીએ આ ખેડૂત પરિવારને પ્રાકૃતિક કૃષિ અપનાવવા તથા ગાયનું પાલન કરવા પ્રેરણા આપી હતી.
