બનાવટી બિલો અને દસ્તાવેજોના આધારે લોન મેળવી ધંધા બંધ કરી દીધા હોવાનો આક્ષેપ; બાજવા બ્રાન્ચને લાખોનું નુકસાન
Vadodara, તા.૨૭
વડોદરામાં યુનિયન બેંક ઓફ ઈન્ડિયાની બાજવા બ્રાન્ચ સાથે આશરે ૧.૪૫ કરોડની કથિત લોન છેતરપિંડીનો મામલો સામે આવ્યો છે. બનાવટી દસ્તાવેજો અને બિલોના આધારે લોન મેળવી બાદમાં ધંધાકીય એકમો બંધ કરી દેવાના આરોપસર છ લોકો સામે જવાહરનગર પોલીસ સ્ટેશનમાં ગુનો નોંધવામાં આવ્યો છે.મૂળ રાજસ્થાનના અને હાલમાં વડોદરાના હરણી વિસ્તારમાં આવેલા રત્નમ લક્ઝુરિયા ખાતે રહેતા આશીષ વેદ પ્રકાશ સુવાલકાએ નોંધાવેલી ફરિયાદ મુજબ, વર્ષ ૨૦૨૦થી ૨૦૨૫ દરમિયાન આરોપીઓએ કથિત રીતે પૂર્વઆયોજિત કાવતરું રચી અલગ-અલગ વ્યવસાય માટે બેંકમાંથી લોન મેળવી હતી.
ત્યારબાદ સંબંધિત બિઝનેસ યુનિટ બંધ કરી દેવામાં આવ્યા હતા. તેમજ સ્ટોક અને મશીનરી પણ સ્થળ પર રાખવામાં આવી ન હોવાનું ફરિયાદમાં જણાવાયું છે. જેના કારણે બેંકને કુલ ૧,૪૫,૧૨,૦૫૬નું નુકસાન થયું હોવાનો આક્ષેપ કરવામાં આવ્યો છે.ફરિયાદ મુજબ, પ્રીતી ટ્રેડર્સનાં પ્રોપરાઇટર પ્રીતી સમીર ખત્રીએ ૯.૮૦ લાખની કેશ ક્રેડિટ લોન લીધી હતી, જેમાંથી ૧૧.૭૯ લાખ બાકી હોવાનું જણાવાયું છે. ગુરુકૃપા ટ્રેડર્સના પ્રોપરાઇટર પીનાકીન શાંતીલાલ પટેલે ૨૪.૭૦ લાખની કેશ ક્રેડિટ લોન લીધી હતી, જેમાં ૨૯.૩૦ લાખ બાકી છે.પટેલ એન્ડ કંપનીના પ્રોપરાઇટર ભારતી શાંતીલાલ પટેલે ૪૨.૩૦ લાખની ટર્મ લોન લીધી હતી, જેમાં હાલ ૩૪.૯૮ લાખ બાકી હોવાનું ફરિયાદમાં જણાવાયું છે. મારૂતી ટ્રેડર્સના નીકીતા પીનાકીન પટેલે ૨૩.૭૫ લાખની બે લોન, જેમાં ૧૦ લાખની અને ૧૩.૭૫ લાખની ટર્મ લોનનો સમાવેશ થાય છે, લીધી હતી. તે પૈકી હાલ ૨૪.૦૨ લાખ બાકી હોવાનું સામે આવ્યું છે.
સીયારામ ટ્રેડર્સના નેહા મિત ગજ્જરે ૧૨.૩૦ લાખની ટર્મ લોન મેળવી હતી, જેમાંથી ૫.૦૫ લાખ બાકી હોવાનું જણાવાયું છે. જ્યારે ધ અમી વીડિયોના પ્રોપરાઇટર મીનાબેન રજનીકાંત ખત્રીએ ૪૨.૭૫ લાખની ટર્મ લોન લીધી હતી, જેમાં હાલ ૩૯.૯૫ લાખ બાકી હોવાનું ફરિયાદમાં જણાવાયું છે.બેંક અધિકારી દ્વારા કરવામાં આવેલી ફરિયાદ મુજબ, આરોપીઓએ સ્ટોક સ્ટેટમેન્ટ, ફેબ્રિકેશનના દસ્તાવેજો, બેંક સ્ટેટમેન્ટ અને પ્રોફોર્મા ઇન્વોઇસ સહિતના કથિત બનાવટી દસ્તાવેજો રજૂ કરીને લોન મેળવી હતી. ત્યારબાદ લોનની રકમ એકબીજાના બેંક ખાતામાં ટ્રાન્સફર કરી અંગત ઉપયોગમાં લીધી હોવાનો પણ આક્ષેપ કરવામાં આવ્યો છે.જવાહરનગર પોલીસે સમગ્ર મામલે છ પ્રોપરાઇટરો સામે ગુનો નોંધી વધુ તપાસ હાથ ધરી છે. પોલીસ દ્વારા લોન સંબંધિત દસ્તાવેજો, નાણાકીય વ્યવહારો અને આરોપીઓની ભૂમિકા અંગે તપાસ કરવામાં આવી રહી છે.
