Ahmedabad,તા.૩
Ahmedabadના શાહપુર વિસ્તારમાં પ્રિવેન્શન ઑફ ક્રાઇમ બ્રાન્ચે મોટી કાર્યવાહી કરીને નકલી વિદેશી દારૂ બનાવવાના ગેરકાયદેસર કારખાનાનો પર્દાફાશ કર્યો છે. શાહપુરની હલીમની ખડકી વિસ્તારમાં આવેલા એક મકાનમાં સસ્તા દારૂમાં કેમિકલ અને ફ્લેવર ભેળવી તેને જાણીતી બ્રાન્ડની બોટલોમાં ભરી વેચવાનો ધંધો ચાલી રહ્યો હતો. ચોક્કસ બાતમીના આધારે પાડવામાં આવેલા દરોડામાં પોલીસે ચાર આરોપીઓને ઝડપી પાડ્યા છે, જ્યારે સમગ્ર કૌભાંડનો મુખ્ય સૂત્રધાર ફરાર હોવાનું સામે આવ્યું છે.
પોલીસ તપાસમાં સામે આવ્યું છે કે આરોપીઓ સસ્તી ગુણવત્તાનો દારૂ ખરીદી તેમાં વિવિધ કેમિકલ અને ફ્લેવર ભેળવતા હતા. ત્યારબાદ તેને જાણીતી વિદેશી બ્રાન્ડની ખાલી બોટલોમાં ભરી, નકલી સ્ટીકર અને સીલ લગાવી અસલી દારૂ તરીકે બજારમાં વેચવામાં આવતો હતો. આ રીતે ગ્રાહકો સાથે છેતરપિંડી કરીને ગેરકાયદેસર નફો કમાવવાનો ધંધો ચલાવવામાં આવતો હતો.
દરોડા દરમિયાન પોલીસે મંદિપ ભાવસાર, કૈલાશ બોડાણા, દેવ પટેલ અને દેવાંગ જાની નામના ચાર આરોપીઓને સ્થળ પરથી ઝડપી પાડ્યા હતા. પોલીસે ૨૨૭ વિદેશી દારૂની બોટલો, કેરબામાં ભરેલો દારૂ, બ્રાન્ડેડ કંપનીઓની ખાલી બોટલો, નકલી સ્ટીકરો, બુચ, ફ્લેવર, હેર ડ્રાયર સહિત બોટલ સીલ કરવાની સામગ્રી, પાંચ મોબાઇલ ફોન અને રોકડ રકમ મળી કુલ અંદાજે રૂ.૧.૫૬ લાખનો મુદ્દામાલ કબજે કર્યો છે.
આ સમગ્ર ગેરકાયદેસર નેટવર્કનો મુખ્ય આરોપી વિક્કી ઉર્ફે મંગો ઉર્ફે બળેલો કનુભાઈ ચૌહાણ પોલીસને ચકમો આપી ફરાર થઈ ગયો છે. પીસીબીએ શાહપુર પોલીસ સ્ટેશનમાં પ્રોહિબિશન એક્ટ હેઠળ ગુનો નોંધી ફરાર આરોપીની શોધખોળ શરૂ કરી છે. આ નકલી દારૂ શહેરના કયા વિસ્તારો અને અન્ય જિલ્લાઓમાં સપ્લાય કરવામાં આવતો હતો તેમજ તેમાં અન્ય કોણ-કોણ સંડોવાયેલા છે તે દિશામાં પણ પોલીસે વધુ તપાસ હાથ ધરી છે.
