New Delhi, તા.1
જુલાઈ માસમાં ગુડઝ એન્ડ સર્વિસ ટેકસ (જીએસટી) કલેકશનમાં નવો રેકોર્ડ નોંધાયો છે અને વાર્ષિક ધોરણે તે 15.4 ટકા વધીને રૂા.2.11 લાખ કરોડ થયું છે. ખાસ કરીને આયાત પરનો જીએસટીમાં વધારો નોંધાયો છે.ગત મહિને પણ ઈમ્પોર્ટ પરનો જીએસટી સૌથી વધુ હતો. જયારે ઘરેલુ જીએસટી આવક 10.1 ટકા વધીને રૂા.1.31 લાખ કરોડમાંથી રૂા.1.45 લાખ કરોડ થઈ છે જયારે આયાત પરનો જીએસટી 28.8 ટકા વધ્યો છે અને રૂા.66511 કરોડ નોંધાયો છે.
આમ કુલ રૂા.2.11 લાખ કરોડનો જીએસટી જુલાઈ માસ દરમ્યાન સરકારની તિજોરીમાં જમા થયો છે જયારે તેની સામે જીએસટી રિફંડ પણ 13.1 ટકા વધીને રૂા.29968 કરોડ નોંધાયું છે. નેટ જીએસટી આવક તેથી રૂા.1.81 લાખ કરોડ થઈ છે જે પણ જુલાઈ 2025ની સરખામણીમાં 10.05 ટકા વધુ છે.
એપ્રિલથી જુલાઈ માસમાં જીએસટી કલેકશન રૂા.8.43 લાખ કરોડ નોંધાયું છે જે ગત વર્ષે આ સમયગાળા દરમ્યાન 7.66 લાખ કરોડ હતું. જીએસટીનું સૌથી વધુ કલેકશન હરિયાણામાં 25 ટકા વધ્યું છે જયારે બીજા ક્રમે ગુજરાત અને તેલંગાણામાં 19 ટકા, પંજાબ અને કેરાળામાં 16 ટકા, ઉતરપ્રદેશમાં 15 ટકા, મહારાષ્ટ્ર કે જે દેશના જીએસટીમાં સૌથી વધુ ફાળો આપે છે ત્યાં 13 ટકા અને કર્ણાટકમાં 12 ટકા, દિલ્હીમાં જીએસટી કલેકશન નોંધાયું છે.જયારે હિમાચલ પ્રદેશમાં 22 ટકા ઘટાડો, ઉતરાખંડમાં 18 ટકા, પુુંડુચેરીમાં 11 ટકા, મધ્યપ્રદેશમાં 10 ટકા, આંધ્રપ્રદેશમાં 5 ટકા અને તામિલનાડુમાં 1 ટકાનો ઘટાડો નોંધાયો છે.
