Washington,તા.06
અમેરિકામાં સ્થાયી થવાનું અને ગ્રીન કાર્ડ મેળવવાનું સપનું જોતાં ભારતીય આઇટી પ્રોફેશનલ્સ અને વિદેશી વિદ્યાર્થીઓ માટે ચિંતાજનક સમાચાર સામે આવ્યાં છે. યુએસ કોંગ્રેસ એટલે કે ત્યાંની સંસદમાં એક નવો કડક કાયદો લાવવાની તૈયારી શરૂ થઇ છે, જે અંતર્ગત H-1B વિઝાને કાયમી વસવાટ એટલે કે ગ્રીન કાર્ડના માર્ગ તરીકે ઉપયોગમાં લેવા પર સંપૂર્ણ પ્રતિબંધ મૂકવાની દરખાસ્ત કરવામાં આવી છે.
રિપબ્લિકન પાર્ટીના કડક વલણ ધરાવતાં સાંસદ ચિપ રોય દ્વારા યુએસ સંસદમાં `અમેરિકન વ્હાઇટ-કોલર વર્કર જોબ્સ એક્ટ’ રજૂ કરવામાં આવ્યો છે. આ ખરડાનો મુખ્ય હેતુ અમેરિકાનાં સ્થાનિક કર્મચારીઓનાં હિતોનું રક્ષણ કરવાનો અને વિદેશી સસ્તા શ્રમિકો પરની નિર્ભરતા ઘટાડવાનો છે.
આ પ્રસ્તાવિત કાયદા હેઠળ સૌથી મોટો ફેરફાર ‘ડ્યુઅલ ઇન્ટેન્ટ’ ની લાંબા સમયથી ચાલી આવતી નીતિને નાબૂદ કરવાનો છે. અત્યાર સુધી H-1B વિઝા ધારકો અમેરિકામાં કામ કરવાની સાથે-સાથે ત્યાં કાયમી નાગરિકત્વ માટે અરજી કરી શકતાં હતાં.
જો કે, નવા બિલ મુજબ, H-1B વિઝા માટે અરજી કરનારે સાબિત કરવું પડશે કે તેઓ પોતાનાં વતનમાં કાયમી રહેઠાણ ધરાવે છે અને તેઓ કાયમ માટે અમેરિકામાં વસવાટ કરવા માંગતાં નથી.
આ ઉપરાંત, ગ્રીન કાર્ડની પ્રક્રિયા બાકી હોય તે દરમિયાન H-1B વિઝા લંબાવવાની હાલની જોગવાઈ પણ રદ કરવાની માંગ કરાઈ છે, જેને કારણે વિદેશી કર્મચારીઓ લાંબો સમય અમેરિકામાં ટકી શકશે નહીં.
ખરડામાં H-1B વિઝાના માળખામાં પણ જડમૂળથી ફેરફાર સૂચવવામાં આવ્યાં છે, જેમાં વિઝાની મહત્તમ મર્યાદા હાલનાં 6 વર્ષથી ઘટાડીને માત્ર 2 વર્ષ કરવાની દરખાસ્ત છે. તેની સાથે જ હાલની કમ્પ્યુટરાઇઝડ લોટરી સિસ્ટમને બંધ કરીને, જે અરજદારોને વધુ પગારની ઓફર મળી હોય તેમને જ પ્રાથમિકતા આપવાની વાત કહેવામાં આવી છે.
આ બિલમાં અમેરિકામાં ભણતાં વિદેશી વિદ્યાર્થીઓ માટેનો ‘ઓપ્શનલ પ્રેકિ્ટકલ ટ્રેનિંગ’ એટલે કે OPT પ્રોગ્રામ પણ સંપૂર્ણપણે રદ કરવાની માંગ કરાઈ છે, જેનાથી અભ્યાસ પૂરો થયાં પછી ભારતીય વિદ્યાર્થીઓ માટે ત્યાં નોકરી મેળવવી અત્યંત મુશ્કેલ બનશે.
સાંસદ ચિપ રોયે આ અંગે જણાવ્યું હતું કે, છેલ્લાં 40 વર્ષથી H-1B વિઝાનો દુરુપયોગ થઈ રહ્યો છે અને કંપનીઓ અમેરિકન ટેકનિકલ યુવાનોનાં ભોગે સસ્તા વિદેશી શ્રમિકોને રાખી રહી છે, તેથી હવે સમય આવી ગયો છે કે આ લોટરી સિસ્ટમ બંધ કરી અમેરિકન વ્હાઇટ-કોલર વર્કર્સને પ્રાથમિકતા આપવામાં આવે.
આ ખરડો એવા સમયે આવ્યો છે જ્યારે ટ્રમ્પ પ્રશાસન કાનૂની ઇમિગ્રેશન પ્રોગ્રામ્સ પર સતત સકંજો કસી રહ્યું છે, જેમાં તાજેતરમાં જ નવી પિટિશન પર 1,00,000 યુએસ ડોલરની ફી લાદવા જેવા કડક નિર્ણયો લેવાયા છે.
આ બિલને ‘યુએસ ટેક વર્કર્સ’ જેવી સ્થાનિક સંસ્થાઓનું વ્યાપક સમર્થન મળી રહ્યું છે અને જો આ બિલ કાયદાનું સ્વરૂપ લેશે તો અમેરિકામાં ભારતીય આઇટી કંપનીઓ અને આઇટી નિષ્ણાતો માટે મુશ્કેલીઓ ખૂબ વધી જશે.
