Ahmedabad,તા.14
ચોમાસામાં વરસાદ પડતાં દડકાં જોવા મળે કે ના મળે પણ સહેજ વરસાદમાં અમદાવાદના રોડમાં ખાડા તો અવશ્ય જોવા મળશે જ. અમદાવાદમાં હાલ સંભવતઃ કોઇ એવો વિસ્તાર બાકી નહીં હોય જ્યાં ભૂવા ના પડ્યા હોય કે રસ્તા ઉબડખાબડ બન્યા ના હોય. રસ્તા પરના ખાડાને લીધે કમરદર્દ ધરાવતા દર્દીઓની સંખ્યામાં પણ 30 ટકા જેટલો વધારો થયો છે. અમદાવાદ માત્ર નામથી જ ‘સ્માર્ટ સિટી’ છે. પરંતુ ચોમાસામાં જે રીતે રોડ રસ્તાઓ ધોવાય છે તેને જોઈને સ્માર્ટ સિટીની પોલ ખૂલેલી જોવા મળી છે. રોડ પરના ખાડાને લીધે ઓર્થોપેડિક પાસ લોઅર બેક પેઇનના દર્દીઓના પ્રમાણમાં પણ વધારો થઇ ગયો છે. રોડના ખાડાથી ડિસ્ક જોઇન્ટ્સ પર દબાણ વધે છે. જો આમ નિયમિતરૂપે થવા લાગે તો તે વધુ ગંભીર સમસ્યા સર્જે છે.
સરકારી હોસ્પિટલમાં ઓર્થોના દર્દીઓનો રાફડો ફાટયો
ખરાબ રોડ રસ્તાઓના કારણે લોકોમાં કમર દર્દ, કરોડરજ્જુ અને હાડકાંને લાગતા રોગોના શિકાર લોકો થયા છે. તેને લઈ ખાનગી હોસ્પિટલથી માંડી સરકારી હોસ્પિટલમાં ઓર્થોના દર્દીઓનો રાફડો ફાટયો છે. અમદાવાદની અસારવા અને સોલા સિવિલમા ઓર્થોપેડીક વિભાગની ઓપીડીમાં કેસોનો ધરખમ વધારો જોવા મળ્યો છે. અસારવા સિવિલના ઓર્થોપેડિક વિભાગમાં દરરોજના આવતાં 100માંથી સરેરાશ 60 દર્દી બેક પેઇનની સમસ્યા ધરાવનારા હોય છે.
બેક પેઇનની સમસ્યાના દર્દીઓની સંખ્યામાં વધારો
ઓર્થોપેડિક ડોક્ટરોના મતે રોડ પરના ખાડામાં સતત વાહન લઇને જવાનું થાય તો તેનાથી બેક પેઇન, કરોડરજ્જુમાં સમસ્યા સર્જી શકે છે. આ અંગે સિવિલ હોસ્પિટલની સ્પાઇન ઈન્સ્ટિટ્યુટના ડિરેક્ટર ડો. પીયૂષ મિત્તલે જણાવ્યું કે, ‘ સામાન્ય રીતે ચોમાસા દરમિયાન બેક પેઇનની સમસ્યા સાથે આવનારા દર્દીઓની સંખ્યામાં વધારો થઇ જતો હોય છે. હાલના સમયે જે વ્યક્તિના હાડકા નબળા હોય તેમને ઓર્થોપેડિક ડોક્ટરોના મતે રોડ પરના ખાડામાં સતત વાહન લઇને જવાનું થાય તો તેનાથી બેક પેઇન, કરોડરજ્જુમાં સમસ્યા સર્જી શકે છે.
તે ખાસ તકેદારી રાખવી જોઇએ
આ અંગે સિવિલ હોસ્પિટલની સ્પાઇન ઈન્સ્ટિટ્યુટના ડિરેક્ટર ડો. પીયૂષ મિત્તલે જણાવ્યું કે, ‘સામાન્ય રીતે ચોમાસા દરમિયાન બેક પેઇનની સમસ્યા સાથે આવનારા દર્દીઓની સંખ્યામાં વધારો થઇ જતો હોય છે. હાલના સમયે જે વ્યક્તિના હાડકા નબળા હોય તેમને વાહનમાં જતી વખતે ખાસ તકેદારી રાખવી જોઇએ. કેમકે, રોડ પરના ખાડામાં વાહન ચલાવવાને લીધે મણકામાં હેરલાઇન ક્રેક થવાની સમસ્યા પણ તેમને થઇ શકે છે. હાલના સમયમાં ખાડો આવે ત્યારે વાહન ધીમું ચલાવવું જ શ્રેષ્ઠ ઉપાય છે. બેક પેઇનની સમસ્યા હવે યુવાનોમાં પણ વધી છે. બેઠાડુ જીવન, લોંગ ડ્રાઇવ કરવું, ખરાબ રોડ, આખો દિવસ વજનદાર બેગ ઉંચકવાને લીધે 30થી ઓછી વયના યુવાનોમાં પણ બેક પેઇનની સમસ્યા જોવા મળે છે.’
નબળા રોડ બનાવનારા સામે કોઇ પગલાં કેમ નહીં…
રોડ પરના ખાડાને લીધે લોકો ત્રાહીમામ પોકારી ગયા છે. લોકોમાં એ વાતનો આક્રોશ છે કે, વાહનચાલક ટ્રાફિકના નિયમનો સહેજપણ ભંગ કરે તો તેને તેના માટે આકરો દંડ ચૂકવવો પડે છે. પરંતુ રોડ કોન્ટ્રાક્ટર દ્વારા બનાવવામાં આવેલા રોડમાં ૬ મહિના કે એક વર્ષમાં જ ખાડા પડવા લાગે તેમ છતાં તેની સામે કોઇ દંડ લેવાતો નથી કે બ્લેક લિસ્ટ પણ કરવાની તસ્દી લેવામાં આવતી નથી. અમદાવાદના અનેક રસ્તામાં તો સ્ટ્રિટ લાઇટ પણ બંધ અવસ્થામાં છે. જેના કારણે રાત્રિના સમયે વાહન ચલાવતી વખતે તેને ભારે પરેશાનીનો સામનો કરવો પડે છે.
તંત્ર તો કુંભકર્ણ નિદ્રામાં છે પણ વાહનચાલકોએ શું ઘ્યાન રાખવું..
• અગાઉથી જ બેક પેઇન કે સર્વાઇકલની સમસ્યાથી પરેશાન હોય તેમણે વાહન ચલાવતી વખતે લમ્બો-સેકરલ બેલ્ટ કે સર્વિકલ કોલર પહેરી રાખવો જોઇએ.
• માત્ર કાર ચાલક જ નહીં તેમની સાથે હોય તેમણે પણ ફરજીયાત સીટ બેલ્ટ પહેરવો જોઇએ, જેથી રસ્તામાં ખાડાને લીધે આવતા જર્કથી બચી શકાય.
• વાહનચાલકે વધુ પડતી ઝડપથી વાહન ચલાવવાનું તેમજ અચાકનક બ્રેક મારવાનું પણ ટાળવું જોઇએ.
• રોડ પરના ખાડા, અસમતોલ રોડથી જેમના નબળા સાંધા હોય તેમને સ્પાઇનલ પ્રોબ્લેમ થવાની સમસ્યા વધી જતી હોય છે.
ડાબા પગમાં દુઃખાવાના દર્દીઓ પણ વઘ્યા…
ખાડા જ નહીં પગમાં દુઃખાવાની સમસ્યાના દર્દીઓ પણ વધારો થયો છે. ખાડાને લીધે વારંવાર ક્લચનો ઉપયોગ કરવાથી કેટલાક કારચાલકો ડાબા પગમાં અસહ્ય દુઃખાવાની ફરિયાદ સાથે પણ આવતા હોય છે.
