New Delhi,તા.04
ઇન્ટરનેશનલ ક્રિકેટ કાઉન્સિલ (ICC)ના અધ્યક્ષ શ્રી જય શાહે તાન્ઝાનિયાના પ્રથમ ICC માન્ય ક્રિકેટ એરિનાનું લોકાર્પણ કરીને આફ્રિકામાં ક્રિકેટના વિકાસના નવા યુગનો પ્રારંભ કરાવ્યો છે.
આ એરિના માત્ર તાન્ઝાનિયા માટે જ નહીં, પરંતુ સમગ્ર પૂર્વ આફ્રિકાના ક્રિકેટ વિકાસ માટે એક મહત્વપૂર્ણ સીમાચિહ્ન માનવામાં આવી રહ્યો છે. વિશ્વસ્તરીય સુવિધાઓથી સજ્જ આ મેદાન હવે આંતરરાષ્ટ્રીય ક્રિકેટ સ્પર્ધાઓનું આયોજન કરવા માટે સંપૂર્ણપણે તૈયાર છે.
લોકાર્પણ પ્રસંગે જય શાહે જણાવ્યું હતું કે, તાન્ઝાનિયા ક્રિકેટ એરિના માત્ર ઈંટ અને સિમેન્ટથી બનેલું સ્ટેડિયમ નથી, પરંતુ તે હજારો યુવા ક્રિકેટરોના સપનાઓ, ક્રિકેટ તાન્ઝાનિયાના અધિકારીઓની દૃષ્ટિ અને રમતના વિકાસ માટે કરાયેલા સતત પ્રયાસોનું જીવંત પ્રતીક છે.
તેમણે ક્રિકેટ તાન્ઝાનિયાના તમામ હોદ્દેદારો, સ્વયંસેવકો અને ભાગીદારોને અભિનંદન પાઠવતાં કહ્યું કે આ સિદ્ધિ સમગ્ર આફ્રિકામાં ક્રિકેટના વિસ્તરણ માટે પ્રેરણારૂપ સાબિત થશે.
જય શાહે ભારપૂર્વક જણાવ્યું કે, ICCનું લક્ષ્ય માત્ર પરંપરાગત ક્રિકેટ રમતા દેશો સુધી મર્યાદિત નથી, પરંતુ વિશ્વના નવા વિસ્તારોમાં પણ રમતનો વ્યાપ વધારવાનો છે. તાન્ઝાનિયામાં તૈયાર થયેલું આ નવું ક્રિકેટ કેન્દ્ર એ જ દિશામાં એક મહત્વપૂર્ણ પગલું છે, જે ભવિષ્યમાં વધુ આંતરરાષ્ટ્રીય ટુર્નામેન્ટો અને યુવા પ્રતિભાઓને તક આપશે.
આ નવું એરિના આગામી 8થી 18 ઓગસ્ટ દરમિયાન યોજાનારી ICC મેન્સ ક્રિકેટ વર્લ્ડ કપ ચેલેન્જ લીગ–Bની મેચોનું મુખ્ય યજમાન બનશે. આ સ્પર્ધામાં વિવિધ દેશોની ટીમો ભાગ લેશે અને વર્લ્ડ કપ ક્વોલિફિકેશન અભિયાન માટે મહત્વપૂર્ણ મેચો રમાશે. આ ટુર્નામેન્ટના સફળ આયોજનથી તાન્ઝાનિયાને આંતરરાષ્ટ્રીય ક્રિકેટ નકશા પર નવી ઓળખ મળશે.
ક્રિકેટ નિષ્ણાતોના મતે, ICC દ્વારા તાન્ઝાનિયા જેવા ઉભરતા ક્રિકેટ દેશોમાં આધુનિક ઈન્ફ્રાસ્ટ્રક્ચર વિકસાવવાનો પ્રયાસ રમતના વૈશ્વિક વિસ્તરણ માટે અત્યંત મહત્વપૂર્ણ છે. આ એરિનાના નિર્માણથી સ્થાનિક ખેલાડીઓને આંતરરાષ્ટ્રીય ધોરણની સુવિધાઓ મળશે, જ્યારે યુવા ખેલાડીઓ માટે તાલીમ અને સ્પર્ધાની નવી તકો પણ ઊભી થશે.
