Surat,તા.૧૫
શહેરના નાનપુરા વિસ્તારમાં ૮૪ વર્ષીય વૃદ્ધાની ઘરમાં જ હત્યા કરવામાં આવતા ચકચાર મચી ગઈ છે. ટી એન્ડ ટીવી હાઈસ્કૂલની સામે આવેલા મોનાલિસા એપાર્ટમેન્ટમાં એકલા રહેતા આમેનાબેન મોતીવાલાનો લોહીલુહાણ મૃતદેહ તેમના ફ્લેટમાંથી મળી આવ્યો હતો. હત્યા બાદ ફ્લેટને બહારથી તાળું મારી દેવામાં આવ્યું હતું, જ્યારે વૃદ્ધાનો મોબાઈલ ફોન પણ ગાયબ હોવાનું સામે આવ્યું છે. સમગ્ર મામલે અઠવાલાઇન્સ પોલીસે તપાસ શરૂ કરી છે.
મળતી માહિતી મુજબ, આમેનાબેન છેલ્લા દોઢ મહિનાથી નજીકના વિધનેશ્વર એસ્ટેટ વિસ્તારમાં રહેતી તેમની ૭૧ વર્ષીય નાની બહેન દુરરીયા સિરાજ મોતીવાલાના ઘરે રહેતા હતા. જોકે, તેઓ દરરોજ સવારે પોતાના ફ્લેટ પર જતા અને બપોર બાદ બહેનના ઘરે પરત ફરતા હતા. બંને બહેનોને મુંબઈ જવાનું હોવાથી આમેનાબેન ગત સવારે આશરે ૯ઃ૩૦ વાગ્યે બેગ પેક કરવા માટે પોતાના ફ્લેટ પર ગયા હતા. બપોરે આશરે ૨ઃ૪૦ વાગ્યે બહેન સાથે તેમની છેલ્લી વાતચીત થઈ હતી. ત્યારબાદ તેઓ સાંજ સુધી પરત ન ફરતા બહેનને ચિંતા થઈ હતી.
આમેનાબેનનો મોબાઈલ ફોન પણ બંધ આવતો હોવાથી દુરરીયાબેન તપાસ કરવા મોનાલિસા એપાર્ટમેન્ટ પહોંચ્યા હતા. અહીં ફ્લેટના દરવાજા પર બહારથી તાળું મારેલું જોવા મળ્યું હતું. ત્યારબાદ ડુપ્લિકેટ ચાવીથી દરવાજો ખોલવામાં આવ્યો હતો. ફ્લેટની અંદર આમેનાબેનનો લોહીલુહાણ મૃતદેહ મળી આવતા પરિવારજનોમાં દોડધામ મચી ગઈ હતી.
ઘટનાની જાણ થતાં અઠવાલાઇન્સ પોલીસની ટીમ સ્થળ પર પહોંચી હતી. પોલીસે મૃતદેહનો કબજો મેળવી ફોરેન્સિક પોસ્ટમોર્ટમ કરાવ્યું હતું. પોસ્ટમોર્ટમના પ્રાથમિક તારણોમાં વૃદ્ધાનું મોત ગળું દબાવવાથી તેમજ માથાના ભાગે કોઈ સાધન વડે ગંભીર ઈજા પહોંચાડવાથી થયું હોવાનું સામે આવ્યું છે. હુમલો એટલો ગંભીર હતો કે વૃદ્ધાની છાતીની એક પાંસળી પણ તૂટી ગઈ હોવાનું તપાસમાં બહાર આવ્યું છે. આ વિગતોને પગલે પોલીસે હત્યા અત્યંત ક્રૂર રીતે કરવામાં આવી હોવાની દિશામાં પણ તપાસ આગળ ધપાવી છે.
હત્યાની ઘટના બાદ આમેનાબેનનો મોબાઈલ ફોન મળી આવ્યો નથી. બીજી તરફ, હત્યારાએ ફ્લેટને બહારથી તાળું મારી દીધું હતું. આ બંને બાબતોને ધ્યાનમાં રાખીને પોલીસ હવે હત્યારાની ઓળખ અને ઘટનાના સંભવિત કારણો અંગે તપાસ કરી રહી છે. ફ્લેટ બહારથી લોક કરવામાં આવ્યો હોવાથી તપાસ એ દિશામાં પણ આગળ વધી રહી છે કે હત્યારો મૃતકનો પરિચિત અથવા વિશ્વાસુ વ્યક્તિ હતો કે કેમ.
મોનાલિસા એપાર્ટમેન્ટમાં સીસીટીવી કેમેરાની સુવિધા ન હોવાથી પોલીસ માટે સીધા બિલ્ડિંગના ફૂટેજ તપાસવા મુશ્કેલી છે. તેથી પોલીસ હવે એપાર્ટમેન્ટની આસપાસના વિસ્તારોમાં લાગેલા સીસીટીવી કેમેરાના ફૂટેજ એકત્ર કરી રહી છે અને શંકાસ્પદ હિલચાલ અંગે તપાસ કરી રહી છે.
પોલીસની તપાસમાં આમેનાબેનના સંપર્કમાં રહેતા લોકોની વિગતો મેળવવામાં આવી રહી છે. ખાસ કરીને છેલ્લા આશરે ૧૦ વર્ષથી તેમના ઘરે ઘરકામ માટે આવતી સઈદા નામની મહિલાની પણ પૂછપરછ કરવામાં આવી રહી છે. આ ઉપરાંત વૃદ્ધાના અન્ય પરિચિતો અને તેમની દૈનિક અવરજવર વિશે જાણકારી ધરાવતા લોકોની પણ પોલીસે પૂછપરછ શરૂ કરી છે. જોકે, તપાસ પૂર્ણ થાય ત્યાં સુધી કોઈ વ્યક્તિને હત્યામાં સંડોવાયેલી ગણવી યોગ્ય નથી અને પોલીસ તમામ પાસાઓની તપાસ કરી રહી છે.
આમેનાબેનનું અંગત જીવન પણ દુઃખદ રહ્યું હતું. તેમના પતિ અબ્દેઅલીનું આશરે ૪૦ વર્ષ પહેલાં હાર્ટ એટેકના કારણે અવસાન થયું હતું. ત્યારબાદ તેમનો એકમાત્ર અને અપરિણીત પુત્ર શબ્બીર પણ વર્ષ ૨૦૧૭માં હાર્ટ એટેકના કારણે મૃત્યુ પામ્યો હતો. પતિ અને પુત્ર બંનેને ગુમાવ્યા બાદ આમેનાબેન મોનાલિસા એપાર્ટમેન્ટમાં એકલા રહેતા હતા. વૃદ્ધાવસ્થામાં એકલવાયું જીવન જીવતા આમેનાબેનની ઘરમાં જ થયેલી હત્યાની ઘટનાથી નાનપુરા વિસ્તારમાં અરેરાટી ફેલાઈ છે.હાલ અઠવાલાઇન્સ પોલીસ દ્વારા હત્યાનું ચોક્કસ કારણ, આરોપીની ઓળખ અને ઘટનાની સમગ્ર કડી જોડવા માટે તપાસ કરવામાં આવી રહી છે. આસપાસના સીસીટીવી ફૂટેજ, મોબાઈલ સંબંધિત માહિતી તથા મૃતકના સંપર્કમાં રહેલા લોકોની પૂછપરછના આધારે પોલીસ હત્યાનો ભેદ ઉકેલવા પ્રયાસ કરી રહી છે.
