New York,તા.18
અમેરિકામાં આ વર્ષે યોજાનારા ફિફા વર્લ્ડ કપને લઈને ત્યાંનાં હોસ્પિટાલિટી ક્ષેત્રે ખૂબ મોટી આશાઓ રાખી હતી, પરંતુ વાસ્તવિક પરિસ્થિતિ ધારણા કરતાં તદ્દન અલગ જોવા મળી રહી છે.
સામાન્ય રીતે આવા વૈશ્વિક રમત ઉત્સવો દરમિયાન મહિનાઓ અગાઉથી જ હોટેલ રૂમ ફૂલ થઈ જતાં હોય છે, પરંતુ આ વખતે આંતરરાષ્ટ્રીય પ્રવાસીઓ તરફથી એડવાન્સ બુકિંગ ઘણું ઓછું અને ધીમું રહ્યું છે.
હોટેલ માલિકોના જણાવ્યાં અનુસાર, વિદેશી ચાહકો આ વખતે ખૂબ જ સાવધાની વર્તી રહ્યાં છે અને છેલ્લી ઘડી સુધી પોતાનાં પ્રવાસનું આયોજન નક્કી કરી શકતાં નથી, જેના કારણે બુકિંગનો ચોક્કસ અંદાજ લગાવવો મુશ્કેલ બન્યો છે.
અમેરિકાનાં હોટેલ ઉદ્યોગમાં ભારતીય મૂળનાં, ખાસ કરીને ગુજરાતી હોટેલ માલિકોનું ખૂબ મોટું પ્રભુત છે અને ‘એશિયન અમેરિકન હોટેલ ઓનર્સ એસોસિએશન’ (AAHOA) દેશની લગભગ 60 ટકા હોટેલ્સનું સંચાલન કરે છે.
એસોસિએશનના અગ્રણીઓના મતે, ન્યૂયોર્ક અને સેન ફ્રાન્સિસ્કો જેવા મોટા ગેઇટવે શહેરોમાં હોટેલના રૂમના ભાવ ભલે ઊંચા સ્તરે જળવાઈ રહ્યાં હોય, પરંતુ રૂમ ભરાવવાનો એકંદર દર અપેક્ષા કરતાં ઘણો નીચો છે. હોટેલ ઉદ્યોગે જે મોટા વૈશ્વિક આર્થિક ઉછાળાની તૈયારીઓ કરી હતી, તે અત્યારે ક્યાંય જોવા મળી રહી નથી.
આ મંદી પાછળનું એક સૌથી મોટું અને મુખ્ય કારણ અમેરિકાની કડક વિઝા પ્રક્રિયા અને ઇમિગ્રેશન નીતિઓ માનવામાં આવે છે. વિદેશી ફૂટબોલ ચાહકો માટે અમેરિકાનાં વિઝા મેળવવાનું કામ અત્યંત કઠિન અને સમય માંગી લે તેવું સાબિત થઈ રહ્યું છે.
ભારત જેવા દેશોમાં છેલ્લાં કેટલાક સમયથી વિઝા એપોઇન્ટમેન્ટ માટે લાંબી રાહ જોવી પડી રહી છે, જેના કારણે ઉત્સાહી ચાહકો ઈચ્છવા છતાં પણ સમયસર પ્રવાસનું આયોજન કરી શક્યાં નથી અને આ જ જટિલ વહીવટી પ્રક્રિયાઓએ આંતરરાષ્ટ્રીય સ્તરે ડિમાન્ડ ઘટાડી દીધી છે.
વિઝાની સમસ્યાઓ ઉપરાંત રમત પ્રેમીઓને આર્થિક મોરચે પણ મોટો ફટકો પડ્યો છે કારણ કે આ વખતે મેચની ટિકિટોના ભાવ આસમાને પહોંચી ગયા છે. ફાઈનલ મેચ માટે ટિકિટની કિંમત હજારો ડોલર સુધી બોલાઈ રહી છે, જે સામાન્ય મધ્યમવર્ગીય પ્રવાસીઓ માટે પરવડે તેમ નથી.
આ સાથે જ આંતરરાષ્ટ્રીય વિમાની મુસાફરી પણ અગાઉનાં વર્ષોની સરખામણીએ ઘણી મોંઘી થઈ ગઈ છે, જેના કારણે આખો પ્રવાસ અતિશય ખર્ચાળ બની જતાં લોકો પ્રવાસ કરવાનું ટાળી રહ્યાં છે.
વૈશ્વિક પરિસિ્થતિની વાત કરીએ તો, અમેરિકા અને ઈરાન વચ્ચે ચાલી રહેલાં તણાવને કારણે આંતરરાષ્ટ્રીય સ્તરે વિમાનના ઇંધણના ભાવમાં મોટો વધારો થયો છે. આ જ આર્થિક દબાણને કારણે એર ઇન્ડિયા જેવી મોટી એરલાઇન્સે ઉત્તર અમેરિકા તરફની પોતાની ફ્લાઇટ્સમાં 39 ટકા સુધીનો મોટો કાપ મૂકવો પડ્યો છે.
ભારતમાંથી વર્લ્ડ કપ માટે થતી પૂછપરછમાં ફેબ્રુઆરી મહિના પછી એકાએક મોટો ઘટાડો નોંધાયો છે, કારણ કે મોંઘા ભાડા અને મર્યાદિત ફ્લાઇટ્સે પ્રવાસીઓનો ઉત્સાહ ઠંડો પાડી દીધો છે.
હાલના તબક્કે આંતરરાષ્ટ્રીય પ્રવાસીઓનો જે મોટો પ્રવાહ આવવો જોઈતો હતો તે ગાયબ છે, જેથી કરીને ટેક્સાસના ડલાસ-ફોર્ટ વર્થ જેવા પ્રખ્યાત વિસ્તારોનાં હોટેલ માલિકો હવે સ્થાનિક બજાર પર આશા રાખીને બેઠા છે.
હોટેલ સંચાલકોને એવી અપેક્ષા છે કે જેમ-જેમ મેચો શરૂ થશે અને ટુર્નામેન્ટ આગળ વધશે, તેમ-તેમ અમેરિકાની અંદરનાં જ સ્થાનિક પ્રવાસીઓ મેચ જોવા માટે આવશે અને છેલ્લી ઘડીએ થનારા આ સ્થાનિક બુકિંગથી હોટેલ ઉદ્યોગને થોડી રાહત મળશે.
