Amreli,તા.07
અમરેલી જિલ્લાના લાઠી પંથકમાં પડેલા અનરાધાર વરસાદથી જનજીવન પ્રભાવિત બન્યું હતું. નીચાણવાળા વિસ્તારોમાં વરસાદી પાણી ઘૂસી જતાં લોકો ભારે મુશ્કેલીમાં મુકાયા હતા. આ દરમિયાન લાઠી નગર પાલિકાના પ્રમુખના પતિ, પાલિકાના સભ્યો અને એન્જિનિયરે સ્થળ પર પહોંચી રાહત કામગીરી હાથ ધરી માનવતાનું ઉત્તમ ઉદાહરણ પૂરું પાડ્યું હતું.
ગઈકાલે લાઠી પંથકમાં પડેલા અનરાધાર વરસાદના કારણે અનેક વિસ્તારોમાં પાણી ભરાઈ જતાં જનજીવન અસ્તવ્યસ્ત બન્યું હતું. ખાસ કરીને લાઠી ગામના ખોડીયાર નગર વિસ્તારના રહેણાંક મકાનોમાં વરસાદી પાણી ઘૂસી જતાં સ્થાનિક લોકો ભારે હાલાકીનો સામનો કરી રહ્યા હતા.
આ પરિસ્થિતિની જાણ થતાં લાઠી નગરપાલિકાના પ્રમુખ પતિ ચેતન લકીયારી, પાલિકાના સભ્ય અમીનબાપુ તથા પાલિકાના એન્જિનિયર ધવલભાઈ ચૌહાણ સહીતની ટીમ સાથે તાત્કાલિક સ્થળ પર દોડી પહોંચ્યા હતા. તેમણે અસરગ્રસ્ત પરિવારોની સ્થિતિનું નિરીક્ષણ કરી જરૂરી રાહત કામગીરી હાથ ધરી હતી.
આ દરમિયાન એક વયોવૃદ્ધ મહિલા પાણીથી ઘેરાયેલા મકાનમાં ફસાયેલા હોવાનું જણાતાં ચેતન લકીયારી, અમીનબાપુ અને ધવલભાઈ ચૌહાણે મહિલાને ખાટલા સહિત ખંભા ઉપર ઊંચકીને સલામત સ્થળે ખસેડી હતી. તેમની આ કામગીરીને સ્થાનિક લોકોએ માનવતાભર્યું અને પ્રશંસનીય પગલું ગણાવ્યું હતું.
આવા વરસાદી આફતના સમયે માત્ર દેખાવ પૂરતા નહીં, પરંતુ લોકો વચ્ચે રહી મદદરૂપ બનેલી પાલિકા ટીમની કામગીરીએ માનવસેવાનું ઉત્તમ ઉદાહરણ પૂરું પાડ્યું હોવાનું સ્થાનિકોમાં ચર્ચાઈ રહ્યું છે.
