ઈરાને કતાર અને પાકિસ્તાન મારફત સાત આકરી શરતો મૂકી અમેરિકા સાથે ફરીથી વાટાઘાટો માટે તૈયારી દર્શાવી
Tehran/Washington, તા.૨૧
પશ્ચિમ એશિયામાં અમેરિકા અને ઈરાનના યુદ્ધ વચ્ચે બંને દેશો વચ્ચે ફરી એક વખત પડદા પાછળ વાટાઘાટોની તૈયારી થઈ રહી છે. ઈરાને કતાર અને પાકિસ્તાન મારફત સાત આકરી શરતો મૂકી અમેરિકા સાથે ફરીથી વાટાઘાટો માટે તૈયારી દર્શાવી છે. આ અહેવાલ મળતા જ મેરિલેન્ડ સ્થિત પ્રમુખ આવાસ કેમ્પ ડેવિડમાં વીકએન્ડની રજાઓ માણતા અમેરિકન પ્રમુખ Donald Trump તાબડતોબ વ્હાઈટ હાઉસ પાછા ફર્યા હતા. આ ચર્ચા વચ્ચે ઈરાન સમર્થિત હુથી બળવાખોરોએ સાઉદી અરબમાં અનેક સ્થળે મિસાઈલ હુમલા કર્યાનો દાવો કર્યો હતો.
ઇરાનની સુપ્રીમ નેશનલ સિક્યુરિટી કાઉન્સીલના સચિવ મોહસીન રેઝાઈએ જણાવ્યું હતું કે ઇરાને કતાર અને પાકિસ્તાન મારફત પોતાની શરતો અમેરિકાને મોકલી આપી છે, હવે ઇરાન પ્રમુખ ટ્રમ્પના જવાબની રાહ જુએ છે. રેઝાઈએ સાતમાંથી ત્રણ શરતો અંગે કહ્યું કે, વાટાઘાટો માટે અમેરિકાએ પશ્ચિમ એશિયામાં તમામ મોરચે યુદ્ધ બંધ કરવું પડશે, અમેરિકન જહાજોની નાકાબંધી ઉઠાવી લેવી પડશે અને ઈરાનનું જપ્ત કરાયેલું તમામ ફંડ મુક્ત કરવું પડશે.આ સાથે રેઝાઈએ એક સોશિયલ મીડિયા પોસ્ટમાં કહ્યું કે, ઈરાનનું મંતવ્ય એકદમ સ્પષ્ટ છે. તેમાં કોઈ વિસંગતતા નથી. ટ્રમ્પે આ યુદ્ધમાંથી બહાર નીકળવું જ હોય તો તેની પાસે ઈરાનના અધિકારો અને શરતો સ્વીકાર્યા સિવાય બીજો કોઈ જ વિકલ્પ નથી.
ટ્રમ્પ દ્વારા અપાતી ધમકીઓનું કોઈ પરિણામ નહીં આવે. અમે નિર્ણયાક યુદ્ધ માટે તૈયાર છીએ.રેઝાઇએ એમ પણ કહ્યું હતું કે અમેરિકા ફરી હુમલો કરે તેવી શક્યતા નકારી શકાય તેમ નથી. જોકે, ઇરાને, અમેરિકાનાં યુદ્ધ જહાજો પર હુમલા કરવાની તૈયારી રાખી જ છે. ઈરાને તાજેતરમાં જ એક અમેરિકન વિમાનવાહક યુદ્ધજહાજ પાસે એન્ટી-શિપ મિસાઈલનું પરિક્ષણ કર્યું છે.દરમિયાન અમેરિકન પ્રમુખ ડોનાલ્ડ ટ્રમ્પ મેરિલેન્ડ સ્થિત પ્રમુખ આવાસ કેમ્પ ડેવિડમાં વીકએન્ડની રજાઓ માણી રહ્યા હતા. આવા સમયે ઈરાનની શરતો અને યુદ્ધ વધુ વકરવાના અહેવાલો વચ્ચે ટ્રમ્પ રજા ટૂંકાવની તાબડતોબ વ્હાઈટ હાઉસ પાછા ફર્યા હતા. વ્હાઈટ હાઉસે ટ્રમ્પના પાછા ફરવા અંગે કોઈ સત્તાવાર કારણ જણાવ્યું નથી.
પરંતુ ટ્રમ્પનું તાત્કાલિક પાછા ફરવું એવા સંકેત આપે છે કે પશ્ચિમ એશિયામાં યુદ્ધ અત્યંત નાજુક વળાંક પર છે. આ સાથે અમેરિકન વિદેશ મંત્રાલયે તેના નાગરિકોને પશ્ચિમ એશિયામાં પ્રવાસ ટાળવા અને સ્થિતિ અનિયંત્રિતરૂપે બગડવાની આકરી ચેતવણી આપી છે.બીજી તરફ ઇરાન સમર્થિત હૂથીઓએ સઉદી અરબ સામે મોર્ચો ખોલી દીધો છે. આ યુદ્ધ વધુ વકરવાની પૂરી સંભાવના દેખાઈ રહી છે. હુથી બળવાખોરોએ સાઉદી અરબમાં અનેક સ્થળો પર મિસાઈલ હુમલાનો દાવો કર્યો છે. જોકે, સાઉદી અરબે તેની પુષ્ટી કરી નથી. બીજીબાજુ અમેરિકાએ સાઉદી અરબ સહિત પશ્ચિમ એશિયામાં તેના નાગરિકોના જવા-આવવા પર ટ્રાવેલ એડવાઈઝરી જાહેર કરી છે. અમેરિકન દૂતાવાસોએ એરપોર્ટ અધિકારીઓનો સંપર્ક કરી વિમાન સેવાઓની પરિસ્થિતિ વિષે સંપૂર્ણ માહિતી મેળવવા કહ્યું છે.
