Ahmedabad,તા.૫
Ahmedabadમાં વધતા ટ્રાફિકને હળવો કરવા માટે મ્યુનિસિપલ કોર્પોરેશન દ્વારા રસ્તાઓ પરના નડતરરૂપ દબાણો દૂર કરવાની કામગીરી શરૂ કરવામાં આવી છે. શહેરના પૂર્વ વિસ્તારમાં આવેલા એસપી રિંગ રોડ પર નાના ચિલોડા સર્કલ નજીક મનપાના ઉત્તર ઝોન એસ્ટેટ વિભાગે મેગા ડિમોલિશન હાથ ધર્યું હતું. કાર્યવાહી દરમિયાન સર્વિસ રોડ પર આવેલા કુલ ૩૧ કાચા-પાકા અને કોમર્શિયલ દબાણો દૂર કરવામાં આવ્યા હતા.
નાના ચિલોડા નજીક એસપી રિંગ રોડના સર્વિસ રોડ પર લાંબા સમયથી ખાણીપીણીની લારીઓ સહિત વિવિધ પ્રકારના નાના-મોટા કોમર્શિયલ બાંધકામો ઊભા થઈ ગયા હતા. આ દબાણોને કારણે સર્વિસ રોડનો ઉપયોગ મુશ્કેલ બન્યો હતો અને મુખ્ય માર્ગ પર પણ ટ્રાફિકનું ભારણ વધતું હતું.આ સ્થિતિને ધ્યાનમાં રાખીને ઉત્તર ઝોનના એસ્ટેટ વિભાગની ટીમે ૫ ઓક્ટોબરની સવારે કાર્યવાહી કરી હતી. એક હિટાચી અને બે જેસીબી મશીનની મદદથી આશરે ૯૦૦ મીટર વિસ્તારમાં આવેલા નડતરરૂપ બાંધકામો દૂર કરવામાં આવ્યા હતા.
મનપાની કાર્યવાહી દરમિયાન સર્વિસ રોડ પર આવેલા કુલ ૩૧ ગેરકાયદે દબાણોને દૂર કરવામાં આવ્યા છે. તંત્રનો હેતુ સર્વિસ રોડને સંપૂર્ણપણે વાહનવ્યવહાર માટે ખુલ્લો કરવાનો અને રિંગ રોડ પર ટ્રાફિકનું ભારણ ઘટાડવાનો છે. એસપી રિંગ રોડ પર દિવસ દરમિયાન મોટી સંખ્યામાં વાહનોની અવરજવર રહે છે. ત્યારે સર્વિસ રોડ ખુલ્લો થતાં સ્થાનિક વાહનચાલકોને વૈકલ્પિક માર્ગ તરીકે તેનો ઉપયોગ કરવામાં સરળતા રહે તેવી શક્યતા છે.
બીજી તરફ એસપી રિંગ રોડ પર રામોલ અને વસ્ત્રાલ તરફ જતા વાહનચાલકો માટે મુશ્કેલી ઊભી થઈ છે. અદાણી સર્કલ નજીક મુખ્ય માર્ગને અડીને મોટો ભૂવો પડતાં તંત્ર દ્વારા સ્થળને બેરિકેડથી કોર્ડન કરવામાં આવ્યું છે.ભૂવાના કારણે વાહનચાલકો માટે જોખમ ઊભું ન થાય અને અકસ્માત ટાળી શકાય તે માટે તાત્કાલિક સુરક્ષાત્મક વ્યવસ્થા કરવામાં આવી છે.અદાણી સર્કલ પાસે પડેલા ભૂવાને કારણે નેશનલ હાઇવે ઓથોરિટી અને ઓડાએ રામોલ-વસ્ત્રાલ તરફ અવરજવર કરતા વાહનો માટે ડાયવર્ઝન જાહેર કર્યું છે. મહત્વના માર્ગ પર અચાનક માર્ગ બદલાતા વાહનચાલકોને મુશ્કેલીનો સામનો કરવો પડી રહ્યો છે.
ખાસ કરીને સવાર અને સાંજના પીક અવર્સ દરમિયાન આ વિસ્તારમાં ટ્રાફિકનું ભારણ વધવાની શક્યતા છે. તંત્ર દ્વારા ભૂવાનું સમારકામ ક્યારે પૂર્ણ કરવામાં આવશે અને વાહનવ્યવહાર સામાન્ય ક્યારે થશે તેના પર હવે વાહનચાલકોની નજર છે.નાના ચિલોડા પાસે મનપાની કાર્યવાહીથી ૯૦૦ મીટરનો સર્વિસ રોડ ખુલ્લો થયો છે, જ્યારે અદાણી સર્કલ પાસે ભૂવાના કારણે ડાયવર્ઝન આપવામાં આવ્યું છે. આમ, એસપી રિંગ રોડના અલગ-અલગ વિસ્તારોમાં એક તરફ રસ્તો ખુલ્લો કરવાની કામગીરી ચાલી રહી છે તો બીજી તરફ માર્ગ પરની સમસ્યાને કારણે વાહનવ્યવહારનું આયોજન કરવું પડી રહ્યું છે.
