લંડન,તા.૨૪
પહેલગામમાં આતંકવાદીઓના કાયરતાપૂર્ણ કૃત્યથી સમગ્ર દેશમાં ગુસ્સો છવાઈ ગયો છે. પહેલગામ આતંકવાદી હુમલા અંગે વિશ્વભરમાંથી પ્રતિક્રિયાઓ જોવા મળી રહી છે. યુનાઇટેડ કિંગડમના ભૂતપૂર્વ વડા પ્રધાન ઋષિ સુનકે આતંકવાદી હુમલા પર દુઃખ વ્યક્ત કર્યું છે. તેમણે પોતાના સોશિયલ મીડિયા હેન્ડલ ’એકસ’ પર લખ્યું, “પહલગામમાં થયેલા બર્બર હુમલાએ નવદંપતી, બાળકો અને સુખી પરિવારોના જીવ લીધા છે. અમારા હૃદય તેમના માટે તૂટી ગયા છે. શોકગ્રસ્તોને જણાવો કે યુકે તેમના દુઃખ અને એકતામાં તેમની સાથે ઉભું છે. આતંકવાદ ક્યારેય જીતી શકશે નહીં. અમે ભારત સાથે ઉભા છીએ.”
આ પહેલા આતંકવાદી હુમલા બાદ અમેરિકાના રાષ્ટ્રપતિ ડોનાલ્ડ ટ્રમ્પે પીએમ મોદી સાથે વાત કરી હતી. ટ્રમ્પે આ આતંકવાદી હુમલાની સખત નિંદા કરી છે અને તેને એક જઘન્ય હુમલો ગણાવ્યો છે. ટ્રમ્પે હુમલાના ગુનેગારોને ન્યાય અપાવવામાં ભારતને સંપૂર્ણ સમર્થન આપ્યું છે. “તેમણે (ટ્રમ્પે) જમ્મુ અને કાશ્મીરમાં થયેલા આતંકવાદી હુમલામાં નિર્દોષ લોકોના મોત પર ઊંડી સંવેદના વ્યક્ત કરી,” વિદેશ મંત્રાલયના પ્રવક્તા રણધીર જયસ્વાલે સોશિયલ મીડિયા પ્લેટફોર્મ ઠ પર એક પોસ્ટમાં જણાવ્યું હતું. આતંકવાદ સામેની લડાઈમાં ભારત અને અમેરિકા એક થયા છે.
પહેલગામમાં થયેલા આતંકવાદી હુમલા બાદ રશિયાના રાષ્ટ્રપતિ વ્લાદિમીર પુતિને ભારતના રાષ્ટ્રપતિ દ્રૌપદી મુર્મુ અને પ્રધાનમંત્રી મોદીને લખેલા સંદેશમાં શોક વ્યક્ત કર્યો હતો. પુતિને કહ્યું કે આ ક્રૂર ગુના માટે કોઈ વાજબીપણું નથી અને ગુનેગારોને સજા મળવી જ જોઈએ. પુતિને આતંકવાદ સામેની લડાઈમાં ભારતના સહયોગનો પુનરોચ્ચાર કર્યો.
ઇઝરાયલી વડા પ્રધાન બેન્જામિન નેતન્યાહૂએ કહ્યું કે તેઓ “આ બર્બર આતંકવાદી હુમલાથી ખૂબ જ દુઃખી છે જેમાં ડઝનબંધ નિર્દોષ લોકો માર્યા ગયા અને ઘાયલ થયા.” “અમારા વિચારો અને પ્રાર્થના પીડિતો અને તેમના પરિવારો સાથે છે,” તેમણે કહ્યું. આતંકવાદ સામેની લડાઈમાં ઇઝરાયલ ભારતની સાથે ઉભું છે.”
ઇટાલીના વડા પ્રધાન ગિઓર્ડાનો મેલોનીએ કહ્યું હતું કે તેઓ પહેલગામમાં થયેલા આતંકવાદી હુમલાથી ખૂબ જ દુઃખી છે. તેમણે અસરગ્રસ્ત પરિવારો, ઘાયલો, સરકાર અને ભારતીય લોકો સાથે એકતા વ્યક્ત કરી. તે જ સમયે, તમને જણાવી દઈએ કે પહેલગામ હુમલા સામે સમગ્ર ભારતમાં વિરોધ પ્રદર્શન ચાલી રહ્યા છે. આ હુમલામાં ૨૬ લોકો માર્યા ગયા છે. આ સમયે, દરેકના મનમાં એક જ વાત છે – આનો યોગ્ય જવાબ ક્યારે આપવામાં આવશે. પીએમ મોદીના ૧૧ વર્ષના કાર્યકાળમાં આ કદાચ પહેલી વાર છે જ્યારે તેઓ વિદેશ પ્રવાસ અધવચ્ચે છોડીને ભારત પાછા ફર્યા છે. આ એક સંકેત છે કે આગામી થોડા કલાકોમાં દેશમાં કંઈક મોટું થવાનું છે.
