મોબાઇલમાં ઘૂસ્યો સાયબર ઠગ; યુપીઆઈ મારફતે રૂ. ૩.૫૮ લાખથી વધુ રકમ ઉપાડી લીધી
(નયના દવે દ્વારા)
Jamnagar તા.૧
Jamnagar જિલ્લાના ધ્રોલ તાલુકાના હરીપર ગામના એક ખેડૂત સાથે ઇન્સ્ટાગ્રામ પર આવેલી ’ફ્રી મૂવી’ની લિંક મારફતે સાયબર ઠગાઈનો બનાવ બન્યો છે. ’એપીકે’ ફાઇલ ડાઉનલોડ કર્યા બાદ અજાણ્યા શખ્સોએ તેમના બેંક ખાતામાંથી યુપીઆઈ મારફતે કુલ રૂ. ૩,૫૮,૫૦૦ ઉપાડી લેતાં સમગ્ર મામલે સાયબર ક્રાઇમ તેમજ ધ્રોલ પોલીસમાં ફરિયાદ નોંધાવવામાં આવી છે.
ફરિયાદ મુજબ હરીપર ગામના જગદીશભાઈ ઉકાભાઈ ભંડેરી ખેતી કરીને પરિવારનું ગુજરાન ચલાવે છે. તેમના બેંક ઓફ ઇન્ડિયાના ખાતા સાથે મોબાઇલ નંબર જોડાયેલો હતો અને ફોન-પે એપ્લિકેશન પણ લિંક હતી. તા. ૦૪ જૂને આઈપીઓ ભરવા માટે ખાતાનું બેલેન્સ તપાસતાં આશરે રૂ. ૩,૫૮,૭૦૦ના બદલે માત્ર રૂ. ૨૦૦ બેલેન્સ દેખાતાં તેઓ ધ્રોલ સ્થિત બેંકમાં પહોંચ્યા હતા. તપાસમાં અલગ અલગ યુપીઆઈ આઈડી મારફતે રકમ ટ્રાન્સફર થઈ ગયાનું સામે આવ્યું હતું.બાદમાં તેમના પુત્રએ જણાવ્યું હતું કે થોડા દિવસ અગાઉ ઇન્સ્ટાગ્રામ પર આવેલી ’ફ્રી મૂવી’ની લિંક પરથી ’એપીકે’ ફાઇલ મોબાઇલમાં ઇન્સ્ટોલ કરવામાં આવી હતી. એપ્લિકેશનમાં કોઈ મૂવી ન દેખાતા તેને ડિલીટ કરી દેવામાં આવી હતી. આ ફાઇલના કારણે જ મોબાઇલ હેક થઈ સાયબર ઠગાઈ થઈ હોવાની શંકા વ્યક્ત કરવામાં આવી છે.
ઠગોએ તા. ૩૦ મેથી ૦૩ જૂન દરમિયાન અલગ અલગ વ્યવહારોમાં રૂ. ૩૦,૦૦૦, રૂ. ૫૦,૦૦૦, રૂ. ૯૫,૦૦૦, રૂ. ૯૫,૦૦૦, રૂ. ૫૦,૦૦૦ અને રૂ. ૩૮,૫૦૦ મળી કુલ રૂ. ૩,૫૮,૫૦૦ બેંક ખાતામાંથી ઉપાડી લીધા હતા. બનાવ અંગે ફરિયાદીએ સાયબર ક્રાઇમ હેલ્પલાઇન ૧૯૩૦ પર પણ અરજી નોંધાવી હતી. સમગ્ર મામલે ધ્રોલ પોલીસે ગુનો નોંધી વધુ તપાસ હાથ ધરી છે.
