Ahmedabad તા.૭
શહેરમાં અસામાજિક તત્ત્વોનો ત્રાસ દિન-પ્રતિદિન વધી રહ્યો છે, ત્યારે ઈસનપુરમાં એક ચોંકાવનારી ઘટના નોંધાઈ છે. અમદાવાદ સેશન્સ કોર્ટમાં પ્રેક્ટિસ કરતા વકીલને મોડી રાત્રે કેસ આપવાના બહાને બોલાવી, તેના ગળે છરી મૂકી જાનથી મારી નાખવાની ધમકી આપી એક્ટિવા લૂંટી લેવાયું હતું. આ મામલે વકીલે વટવાના માથાભારે શખ્સ વિરુદ્ધ પોલીસ ફરિયાદ નોંધાવી છે.શહેરના કલાપીનગરમાં રહેતા અને સેશન્સ કોર્ટમાં વકીલાત કરતા હર્ષ પ્રજાપતિને ગત સાંજે એક અજાણ્યા નંબર પરથી ફોન આવ્યો હતો. ફોન કરનારે પોતાનું નામ મોહંમદ સુહાન શેખ(રહે. વટવા) જણાવી તેની સામે ગુનો નોંધાયેલો હોવાથી તે ફરાર છે અને કોર્ટ કે ઓફિસે આવી શકે તેમ નથી તેમ કહીને વકીલને કેસ બાબતે ચર્ચા કરવા અને જરૂરી કાગળિયા આપવા માટે શાહઆલમ વિસ્તારમાં મળવા બોલાવ્યા હતા. શરૂઆતમાં વકીલે જવાની ના પાડી હતી, પરંતુ બાદમાં મોહંમદ સુહાને રાત્રે ફરીથી ફોન કરીને તેના એક જૂના ક્લાયન્ટ સોહિલનો રેફરન્સ આપી અગત્યની ફાઈલ બતાવવાનું કહેતા વકીલ પોતાના ભાણેજનું એક્ટિવા લઈને શાહઆલમ દરવાજા પહોંચ્યા હતા. રાત્રે સાડા અગિયાર વાગ્યાના સુમારે હર્ષ પ્રજાપતિ શાહઆલમ ચોકીદાર બાવાની દરગાહ પાસેથી પસાર થઈ ઝારા ફ્લેટ તરફ જઈ રહ્યા હતા ત્યારે લીમડાના ઝાડ નીચે ઊભેલા મોહંમદ સુહાને તેમને ઊભા રાખ્યા હતા. વકીલે ઘરે જઈને વાત કરવાનો ઈનકાર કરતા જ આરોપી ઉશ્કેરાઈ ગયો હતો અને પોતાની કમરમાંથી તીક્ષ્ણ છરી કાઢી વકીલના ગળે મૂકી દીધી હતી. તેણે ધાકધમકી આપી વકીલને ધક્કો મારીને નીચે પાડી દીધા હતા અને એક્ટિવા લઈને ફરાર થઈ ગયો હતો. આ બનાવ બાદ વકીલે પોતાના ક્લાયન્ટનો સંપર્ક કરતા તેણે વાહનો પરત અપાવી દેવાની ખાતરી આપી હતી, પરંતુ દિવસો વીતવા છતાં એક્ટિવા પરત ન મળતા અને સતત વાયદાઓ કરાતા આખરે વકીલે ઈસનપુર પોલીસમાં મોહંમદ સુહાન વિરુદ્ધ લૂંટ અને ધમકીની ફરિયાદ નોંધાવી હતી.
